@ghdnews.in@

Shillong, Feb 12, 2026: Re·anggipa antio Meghalaya a·dokni East Jaintia Hills a·jao koela a·damo goprete a·sel ong·anio janggi galgipa manderang sak 32 gapaha.

East Jaintia Hills a·jani Deputy Commissioner-ni parakatani gitade, Mynsyngat jolni Thangsko koela a·damo jachange donggipa manderangko sandianiko, February 9 tarikni attam 5 bajio dontongataha. February 5 tariko koela a·damo goprete a·sel ong·ani ja·man manderangko am·sandianio NDRF, SDRF, Special Rescue Team, Pulis aro District Administration-ni manderangba bak ra·angaha.

Koela a·damo a·sel ong·anichi saknaako man·gipa manderang, chong·motan Guwahati-ni Agile Hospital-o sanenggipa Jamil Ahmed Choudhury aro Shillong-ni NEIGRIHMS-o dongipa Deb Malakar sakgnian janggi galaha aro uandake sianggipa manderang chu·gimik sak 32 ong·aha.

Ua biapo obosta ong·ani ja·mano, district administration, niamgri koela bikotanirangko am·sandina gong·rake kamrangko ka·aha. Dingtangmancha dol bonga manderang, jekai Executive Magistrate-rang, pulisrang aro Directorate of Mineral Resources-ni manderangko am·sandirangko dakchina ge·etaha.

February 10 tariko, authoriety-rang Sohkymphor sorokoniko koelarangko 1,020 Metric Tonne-rang (MT), Sohkymphor aro Byrwai sorokoniko 2,091.496 MT, Sohkymphor Lurimkhliehshnong-oniko 227.78 MT aro Byrwai song aro Ladmynska-ni gisepo donggipa sorokoniko 1,058 MT-rangko man·aha.

Uandake February 11 tariko, Japmala songoniko 432.15 MT koelarangko man·dapaha. Indake niamgri bikotgipa koelarangko salgnini gisepon 4,800 MT-rangko man·aha aro ian a·jao niamgri koela bikotanirang bang·en dongenga ine mesokani ong·a.

Iandake niamgri koela cho·giparangni kosako badi ba FIR-rangko segataha aro niamko ja·rike kamrangko ka·angenga ine EJH a·jani District Administration parakataha.

Unbaksana, manderangni naljokanina aro am·sandianirangko name dakna, District Magistrate-ba Bharatiya Nagarik Suraksha Sanhita (BNSS)-ni Section 163-ni ning·o pangchake koela cho·anirangko dontongatchina ge·etaniko on·ataha.

Indake, kam ka·enggipa dolrang baksa bakrimchina aro niamgri koela cho·anirangko dakjachina aro kengnigipa aro beng·gimin koela a·damrangchi re·angjachina gitaba authority-rang manderangna mikrakataniko on·angaha.