Jowai, Feb 21, 2025:Jaintia Hills Autonomous District Council (JHADC)-ni election-na da·al February 21 tariko lekka pu·onani somoio, East Jaintia Hills a·jani, Wapung Skur minggipa Polling Station ge·saona ma·sina man·gijagipa manderang re·bae, Electronic Voting Machine ( EVM)-ko nosto ka·e donangaha ine koborna u·iataha.

East Jaintia Hills-ni Superintendent of Pulis (SP) Giri Prasad-ni u·iatani gitade, ua obosta pringni 11:30 baji mango ong·aha.

A·sel ong·aniko kobor man·soani bakan, East Jaintia Hills a·jani Deputy Commissioner (DC) Shivansh Awasthi aro SP a·sel ong·gipa biapona re·ange nieaha. Vote pu·onenggipa manderangko naljokatna gita ua polling station-ona pulis dolrangko watdapataha ine SP u·iataha.

Ua a·sel ong·anio darangba saknaaniko man·jaha aro manderangko simsake dongchina SP mol·molangaha. Denggu dakgipa manderangni kosako nambate ma·sina gita sing·sandiani aro am·sandianirangko dakenga ineba SP parakataha.