Williamnagar, May 15,2025: Ia 2025 bilsini Secondary Skul Leaving Certificate (SSLC) porikkao bang·bata chatro chatrirangan pass ka·ahaoba, East Garo Hills a·jani higher secondary aro college-rango seat-rang chu·ongjae, admission ra·na man·tokjaengani gimin chatro chatrirangni namgnina, pilak higher secondary skul aro college-rangon morning aro evening shift-rangko kulidapchina, A·chik Organisation for Social Welfare (AOSW) dabiangaha.

Iani bidingo a·dokni Education Minister Rakkam A Sangma aro PHE Minister Marcuise N Marak-na seachi u·iatenba, East Garo Hills a·jani higher secondary skulrango aro college-rango chu·onga gita seat-rang dongjani a·sel ia 2025 bilsini SSLC porikkako pass ka·gipa ritchani ritcha chatro chatrirang, admission ra·na man·jae neng·nikanirangko chagrongtokenga ine AOSW, HQ Simsanggre-ni General Secretary Premier N. Sangma parakatenba, higher secondary skulrango aro college-rango morning aro evening shift-rangko kulidape on·china didiataha.

East Garo Hills a·jani higher secondary skulrango aro college-rango morning aro evening shift-rangko kuligenchimoba, skul aro college-rango skigiparangna kamrang jakchakgijani ong·skagen, ine janapatenba AOSW, ia higher secondary skulrang aro college-rangna Adhoc ba guest lecturer-rangko songe on·skachina a·dok sorkariko didiataha.