Willismnagar, Sept 21, 2025:: East Garo Hills a·jani District Selection Committee (DSC), adita salrangna skang Lower Division Assistant (LDA)-ni kamna ra·anio niamrangko ja·rikjaha ine East Garo Hills a·jani dingtang dingtang NGO-rang, jekai GSU, AAYF, AHAM, APA, ACHIK, AOSW, NGCO, ADIL, Mothers’ Union, Simsanggre Indigenous Peoples’ Forum (SIPF) aro gipin dolrang matnangatenba, ia kamna ra·gipa porikkani result-rangko nipiltaichina dabiangaha.

lani bidingo East Garo Hills a jani Deputy Commissioner-na badi ka·e sedoatengon, adita salrangna skang DSC-ni gita LDA-ni kamna ra·anio niamrangko ja·rikjahani a·sel East Garo Hills a·jani candidate-rang seokako man·pajaha ine NGO-rang matnangatenba, ia kamna ong·atgipa porikkani result-rangko nipiltaichina dabiangaha.

Backward Class, Indigenous group-rangna Article 16 (4)-ni ning·o dongimin biaprangko ja·rikjani a sel ia kamna ra·anio ong·gija dakaha ine janapatengon, East Garo Hills-ni candidate-rangba ia kamna seokako man·pachina porikkani result-rangko nipiltaichina NGO-rang, Deputy Commissioner-ko didiataha.

NGO-rangni parakatani gitade, LDA-ni kamna ra·gipa porikkani result-rangko ia bilsini April 2 tariko aro Combined Written Test Examination-ni result-koba ia bilsini July 21 tariko parakahachim. Indiba ong·gija dake candidate-rangko seokahani a·sel, East Garo Hills a·jani LDA kamna porikka segipa bang·bata candidate-rangan chu·sokna man·jaha.