Williamnagar, May 17, 2025: Ja·manchake koborko man·soani gitade, re·anggipa May-ni 14 tarik salni 12:30 bajimango, East Garo Hills a·jani Songsak constituency-o ga·akgipa, Samin Silki PWD soroko bilakgipa 11kv bijoli wire-rang tang·one, dongenggipao dumper truck nangpake kenbegnigipa a·sel ong·aha aro dumper truck driver saksa janggitangko gimaataha.
Ia a·sel ong·aniko A·chik Dedicated Integrity Leaders (ADIL) jegalatenba, PETCO Official-rang, SDO aro lineman-rang an·tangtangni kamko nirok simsakjani a·selsa, ia obosta ong·aha ine matnangataha.
Ia a·sel ong·na skangan, songni manderang changni chang complaint-rangko ka·ahachim, indiba SDO aro line-man-rang simsakgija donani a·sel ong·aha ine ADIL-ni Chairman Francis C.Marak matnangataha.
Kamna simsakgijagipa department-ni manderangko ta·rake ra·galchina aro duko ga·akgipa nokdangna compensation-ko on·china dabiangenba, mikkangchi iandakgipa a·sel ong·aniko champengna aro manderangko chel·chake rakkina niroke kamrangko ka·china ADIL didiataha.
Ua jolo bilakgipa 11kv bijolini wire-rang tang·onahani gimin, manderangna namen kenchakani ong·enga. Uni gimin, manderangni naljokanina bil gnanggipa department-ni official-rang ta·rake kamrangko nirokathina ADIL didiataha.
