Williamnagar, April 17, 2025: Simsanggre Indigenous Peoples’ Forum (IPF), East Garo Hills a·jao District Selection Committee (DSC)-ni LDA kamna porikka ra·gipa candidate-rangni bimingko parakatani ja·man, name nipitaianiko dakchina dabie DC cum DSC-ni Chairman-na chitti sedoataha.
District ge·antion, DSC district-tangni kam gri dongenggipa chadamberangna kamrangko a·kange donenga. Indiba East Garo Hills a·jani DSC-de district-tangni ba Meghalaya a·dokoni ong·gijagipa candidate-rangsa, East Garo Hills-o DSC-ni kamna porikka ra·anio bang·bate seokako man·aha. Ian a·jatangni ong·gijagipa candidate-rangna mikpakma niani aro apsan ong·gijani kam ong·a ine IPF, DSC-ni Chairman-na sedoatgipa chittio janapataha.
Batanggipa somoio LDA-ni kamna porikka ra·ani result-ko East Garo Hills a·jani DSC, April 2 tariko parakatanio biming nakatgipa serial number 24, Roll number 2263-gipa Matgrik D.Shira Meghalaya a·dokoni ong·ja, Assam Nidanpur-onisa ong·achim. Uasan ong·aigija bang·a candidate-rangan gipin biaprangoni kamna galgiparang donga, uamang an·tangtangni document-rang ba lekkarangko tarie, Meghalaya a·doko kamna galenga. “Chinga uarangko raken jegala aro uamangko kamo rimnapna skang uamangni document-rangko namedake check ka·e, scrutinize ka·na nangchongmota ine chinga dabienga Unbaksana, kamna galenggipa chadamberangko skang gita District Unemployment Exchange-ni Registration Certificate-ko mongsonggipa dake donchina” IPF, DSC-ni Chairman-ko didiangaha.
Re·anggipa DSC-ni kamna galanio gipin district-oni ba a·paloni candidate-rangkosa bang·bate kamna ra·aha ine janapatenba, “Songtango ba a·jatango dongkamgipa candidate-rangna 50%-ko a·kangenba, poraia matchote kamgri dongenggipa Simsanggre-ni chadamberangna cholko on·china IPF dabiangaha”.
“Chinga pangnan DSC-ni Member Secretary-rangni gipin district-oniko kamna ra·aniko nike dongenga, chinga bang·a changon, district-tangni chadamberang skanggipa cholko on·china ba kamo rakkichina neng·nikanirangko janape lekka sedoatronga. Indiba, Member Secretary-rang chadamberangni neng·nikanirangko ma·sichakja” ine IPF-ni President Arun N.Marak suk ong·gijaniko parakataha.
