Williamnagar, April 29,2025: East Garo Hills a·jani Kusimkolgre Dalja Awe songo Simsang chibimaoniko aro Dawagre-o Rongpi chiringoniko niamgri an·chengrangko bikotengani gimin ua jolrango songdongenggipa manderangna neng·nikaniko ra·baenga ine parakatenba, Garo Hills Youth Solidarity (GHYS), East aro North Garo Hills (T) Division-ni District Forest Officer-na badi ka·e lekka sedoataha.

DFO-na badi ka·e sedoatgipa chittio GHYS-ni parakatani gitade, chiringrangoniko skatang an·cheng bikotaniko National Green Tribunal (NGT) champengatahachim, indiba East Garo Hills a·jao donggipa jolrango da·onan dal·dalgipa kolrangko jakkale an·chengrangko kitengani a·sel chiring chibisikrangna aro ua jolrango songdongenggipa manderangna nangchakeani ong·enga.

Williamnagar Kusimkolgre Dalja Awe-o JCB, tractor aro dumper garirangko jakkale an·cheng kitaniko AOSW, jegale uandakgipa kamrangko Forest department-ba nikenggen, indiba maming ja·kurangko de·jaenga. Ua jolrango china dilengani gimin Williamnagar jolo songdongenggipa manderang, pilak nanga kamrangnan Simsang chibimako jakkaltokenga, indiba da·o ua chibimaoniko niam gri dal·dalgipa kolrangchi an·cheng bikotengani a·sel manderang chi jakkalna man·jae, neng·nikanirangko chagrongenga, ine GHYS-ni President Endick Marak parakataha.

East Garo Hills a·jani Dawagre-o donggipa Rongpi chiringoniko ML-13A 1410 JCB aro tractor-chi an·cheng bikotenga ine parakatenba, ua jolrango songdongenggipa manderang gimikan Rongpi chiringko jakkaltokenga, indiba da·o ua chiringoniko niam gri an·cheng bikotengani a·sel manderang auna, ba·ra su·na, bosturangko su·galna aro pilak kamrangko ka·na man·jaengaha ine GHYS matnangataha.

Uandake, Rangmalgre song sambao donggipa ramao niam gri ro·ong bikotengani a·sel samtangtango ong·telaigipa bakrangna aro jolo songdongenggipa manderangna nangchakeaniko ra·baenga ineba GHYS, DFO-na badi ka·doataha.