Tura, Mar 22,2025: Meghalaya Legislative Assembly-o Warachakenggipa dolni dilgipa Dr.Mukul M.Sangma, Sukrobar salo Tura-ni dingtang dingtang NGK-rangni dilgiparang baksa Tura Lower Babupara-o donggipa Garo Labour Corps-ni Cenotaph-ko pe·e galaniko nina re·angaha.

Uandake, Dr. Sangma Tura-ni dingtang dingtang dolrang baksa agangrikengon, West Garo Hills a·jani Deputy Commissioner aro Tura Municipal Board (TMB)-ni officer-rangni talatanirang chu·ongja ine dingtang dingtang dolrang matnange jegalani gimin, ua maimancha ong·a, talbate ma·sina tom·aniko ong·atangaha.

Uni ja·mano Dr. Sangma Tura-ni DC Jagdish Chelani aro Mothers’ Union baksa Civil Society Organization-ni dilgiparangko okame DRDA Conference Hall-o tom·aniko ong·ate, chanchirimaniko dakangaha.

Tom·anio Warachakenggipa dolni dilgipa aro Songsak-ni TMC, MLA Dr.Mukul Sangma, baksa Kharkutta-ni MDC aro gitcham MLA Cherak W.Momin, Williamnagar-ni MDC Alphonsus R.Marak, Damas-ni MDC Ferdinand D.Shira aro dingtang dingtang dolrang baksa chanchirimaniko dakengon, A·chikrangni gisik ra·na tarie donenggipa aro A·chik pagitchamrangko mande ra·e manirongenggipa biapni Cenotaph-ko pe·e galahani gimin, mai misonganio Cenotaph-ko pe·aha sing·doaniko dakenba, ua Cenotaph-ko A·chikrangni nangnika gita apsandaken, apsan biapo maming dingtangatgija taripilchina Deputy Commissioner-ko didiangaha.

“A·chikrangni Ma·ambio ian France a·songo dal·begipa dakgrikani a·bao kamrangko ka·e sianggipa, A·chik pagitchamrangko mande ra·e, gisik ra·na gita tarigimin, Garo Labour Corps-ni Cenotaph ong·achim. Ua Cenotaph-ko pe·aniara A·chik jatko namen gisik saatani ong·aha. Ua biapo manggisiko gopajaoba, ua biapara gopraman ong·a aro ian dakronggija kamko dakaha ine nikaha. Gopramko maming saloba chona ba bilna man·ja, ian kragijani kam ong·a. Pilak kamko ka·na skangba DC aro TMB-ni officer-rang darangmingba ku·mongchenggija ja·ku de·ani a·sel ong·aha” ine Dr. Sangma aganaha.

“Chinga ua biapko niani ja·man, District Administration aro dingtang dingtang dolrang baksa chanchirimaniko dakaha. Ua Cenotaph-ko pe·e galani bidingo Deputy Commissioner, chingna talatengon, ua biapko mikkangchi nambate aro nitobate tarina gitasa Cenotaph-ko pe·aha, ine DC chingna talataha” ine Dr Sangma aganaha.

Ua biapara, A·chikrangni gamchatbegipa biap ong·ani gimin, uko pe·na skangba name chanchichengna aro songdongenggipa manderang baksa ku·mongchengna nangachim, ineba Dr. aganaha.

“Anga bebe ra·a aro ka·donga je dakgialanirang dongoba, sorkari jatni nangnikaniko dakgen aro namdapatgen. Ia kamo pilakkon bak ong·atna nanga. Maina sorkaride jatko represent ka·ani gimin responsibility-ko ra·na bil donga aro ua responsibilty-ara uamangni daitoan ong·a. Uni gimin ia kamo darangba politics dongna nangja, iade jatni issue-sa ong·a. Ia Cenotaph-ko pe·na ja·ku de·anio district administration aro TMB maming u·iatchenggija pe·aha ine anga chanchia. Garo Hills-ni manderang baksa ku·monge kam ka·genchimode, iandakgipa obostarang ong·jawachim. Uni gimin mikkangchi jatna gisik saaniko on·jana gita, je kamko ka·genoba pilakkon bak ong·atna nangchongmota” ine Dr. Sangma aganangaha.

Ua cenotaph-ko pe·e galani bidingo Garo Hills-ni manderang namen gisiko saaha, maina ua biapara chengonin pagitchamrangko gisik ra·na dingtangmancha tarigimin gamchatbegipa biap ong·a aro uko maming dakeba pe·e galna man·jachim. Uni gimin mikkangchi simsake aro name kamrangko ka·china, Dr. Mukul district administration-ko didiangaha.

Indake ong·engon, ua cenotaph-ko pe·e galenba, commercial complex-ko rikna miksongani dongja. Indiba pilakni namgnina, ua biapko nambate aro jakkaltona gita taridapnasa miksongenga ine Deputy Commissioner talataniko on·angaha.

Ua biapo manderang chu ringe, bottle-rangko skatang sera bera gala baksana su·buchakram biap dake jakkalengani gimin, mikkangchi ua biapko rongtale aro nambate rakkina aro bilsianti manirongenggipa Garo Labour Corps Day-ko nambate manina gita cenotaph-ko taridapna miksongenga ineba DC agan talatangaha.