Tura, Dec 4,2024:Re·anggipa Gambegre by-election-o National People’s Party (NPP)-ni candidate aro Skotong Minister Conrad K Sangma-ni jikgipa Dr. Mehtab Chandee A Sangma-ni chea ja·man Indian National Congress (INC) aro Trinamool Congress (TMC) dolrang suk ong·gijaniko nikna man·ani gisepon TMC-ni dilgipa Dr. Mukul Sangma, an·tangni watanggipa Congress dolona re·angpilna miksongenga ine jangbingbanganirangko knasoe bang·a manderangni gisepo sing·anirang ong·katenga.

Dr. Mukul Sangma Congress dolona re·angpilna miksonganirang donga ine jangbingbanganirangko knasoengon, Meghalaya Pradesh Congress Committee (MPCC)-ni President Vincent Pala, uamangni gisepo agangrikanirang dongenga ine parakataha. Indake ong·genchimoba, Dr. Sangma-ni Congress-o napaniko AICC-ni dilgiparangsa tik ka·gen ine Pala parakatskaaha.

TMC-oni kobor gitade, da·o dipet Dr. Mukul Sangma Congress-o napangpilna sienga ine jangbingbanganirangko tik ong·e aganna man·kujaenga, indiba TMC-ni bang·bata dilgiparangan Meghalaya a·doko, I-PAC-ni jak on·paanina suk ong·niktokjaenga, maina I-PAC-ni jak on·paanichi election-rango TMC-ni candidate-rangna namgni ong·ani pal batesa namjabatskaenga.

Re·anggipa 2023 bilsini Assembly election-o TMC, seat dam 5-san chena gita man·aha aro Assembly election-o TMC chena ka·dongahaoba dam 5 mangmang seat-ko cheaniara, dilgiparangni Congress-ko wate TMC-o napanganina manderang suk ong·gijaniko mesokaniba ong·achim.

“Garo Hills-o TMC-ko West Bengal party ine bang·a manderangan Dr. Mukul Sangma-ko namniktokgenchimoba TMC-ko ra·chakna man·jaha,” ine Tura-ni saksa aganaha.
Da·o Dr. Mukul Sangma, Congress dolona re·angpilna sienga ine jangbingbangengon, ua Congress dolona re·angpilgenchimode, manderang changsatai uko bilona ra·bapilskaani chol donga ine manderang aganatskaaha.