@ghdnews.in@

Tura, Feb 11, 2026: West Garo Hills a·jani a·kawe jolrango niamgri chalaienggipa ita karkanarangko champengna ja·ku de·chakatengon, Monggolbar salo District Level Task Force (DLTF)-ni official-rang, Phulbari jolrango niamgri chalaienggipa ita so·ani karkanarangko pe·e galtokaha.

Ua ita so·ani karkanarangko, DLTF-ni Member Secretary aro DFO Rupankar R Marak-ni dilanichi a·kawe jolrango niamgri chalaienggipa ita karkanarangni gimin kobor man·soe, ita karkanarangko chadrapeaha.

DLTF-ni Official-rang, a·kawe jolrango niamgri chalaienggipa ita karkanarang jekai Gomaijhora, Phulbari aro Batabari jolrango niamgri chalaienggipa ita so·ani karkanarangko pe·e galeaha. Ua ita so·ani karkanarangko Meghalaya Minor Mineral Concession Rules (MMMCR), 2016-o on·gimin niamrangko pe·e, State Pollution Control Board-ni Consent to Establish (CTE) ba Consent to Operate (CTO)-ko manigija chalaiengani gimin, DLTF-ni official-rang, pe·e galeaha.

Indake ua ita karkanarangko niamgri chalaiengani gimin una skangba district official-rang, mikkrakataniko on·ahachim, indiba sorkari official-rangni mikkrakataniko aro beng·aniko manigija, ita so·ani karkanarangko chalaitokengachim.

Adita salrangna skang, District Administration, Pulis, Forest Department, Water Resources, State Pollution Control Board aro independent member sakgni DLTF-ni tom·anio, niamgri chalaienggipa ita karkanarangko pe·e galna aro niamgri a·a cho·anirangko rim·china ge·etaniko on·angaha.

Ua ita so·ani karkanarangko pe·e galanio DLTF, JCB bolgniko jakkalaha aro ua karkanarangoniko ra·sekgipa bosturangko, Range Office-ona ra·angaha.

Mikkangchiba iandake niamgri chalaienggipa karkanarangko DLTF champengna kam ka·angkugen ine parakatenba, banoba niamgri kam ka·anirangko nikgenchimode, DFO aro DLTF-ni Member Secretary-na kobor on·atchina songdongenggipa, manderangko didiataha.