Tura Feb 27,2025: West Garo Hills a·jao donggipa Dalu Dingkajora songni bilsi 23 ong·gipa me·chikma Nokmera N.Sangma, re·anggipa February 23 tarik pring dipet uni phone switch off ong·enga ine nokdangni manderang u·iataha.
Koborni gitade, Nokmera Sangma re·anggipa January 7 tariko “Resource Improve Life, Indian Marketing Pvt. Limited, Vijaynagar Kamrup”, Assam-o donggipa Company ge·sao kam ka·na gita re·angahachim. Uni re·anga ja·mande, una call ka·oba man·achim, indiba February 23 tarik pring dipet, una call ka·oba man·jaha, switch off ong·aiaha, ine u·iataha.
Da·odipet Nokmera Sangma-ni bidingo maming koborko man·kuja. Ua mai ong·aha, bachi re·angaha ma·sina man·kujaenga, ine nokdangni manderang u·iataha.
Ia obostani bidingo Nokmera Sangma-ni segipa Jehobath M.Sangma aro nokdangni manderang Dalu Pulis Station-o FIR ka·na re·angahachim, indiba Company-ni nokgipasa FIR ka·na nanggen ine Dalu Pulis Station-o FIR-ko ra·chakjaha ine dokdangni manderang koborna u·iataha.
