@ghdnews.in@

Tura, Feb 20, 2026:Re·anggipa January 9 tariko West Garo Hills a·jani Rajabala jolo donggipa Goalgaon songo, ACHIK dolni member Dilseng M Sangma-ko so·otanio jak donggipa mande sakgniko pulisrang, Budbar walo rim·dapna man·aha aro ua a·selna rim·ako man·giparang da·o gimik sak 15 gapaha.

Pulisrangni parakatani gitade, ia a·sel ong·aonin ua sakgni manderang pulisrangoni kate dongengachim aro ua mande sakgniko West Garo Hills a·jani dolsa pulisrang, East Khasi Hills a·jani Mawsynram songoniko rim·na man·aha.

Rim·ako man·gipa mande sakgniara, Bowabari songoni bilsi 43 ong·gipa Aminul Islam aro bilsi 45 ong·gipa Gazi Rahman ong·achim.

Re·anggipa January-ni 9 tariko Rajabala Pulis Station-ni ning·o donggipa Wadagokgre aro Rongsanggre A·kingoniko niamgri ro·ong bikotengako chipatna re·ange re·bapilengmiting somoio ACHIK dolni member-rangko Goalgaon songo, dolsa manderang ro·ong, rua, jompol aro uandakgipa silchidarerangchi chadrapsoaha aro ACHIK dolni member saksa Dilseng M Sangma, rasong gribee so·otako man·ahachim.