@ghdnews.in@

Tura, Jan 17, 2026: Re·anghipa January 9 tariko, West Garo Hills a·jani Wadagokgre A·kingni ning·o donggipa Goalgaon songo, A·chik Conscious Holistically Integrated Krima (ACHIK) dolni member-rangko chadrapanio saksa Dilseng M Sangma-ko so·otanio jak donggipa sakgni manderangko rim·dapna man·aha. Ua a·selo jak donggipa manderangko rim·a da·o sakdok gapaha.

Re·anggipa January-ni 9 tariko ACHIK Organisation-ni member-rang Wadagokgre aro Rongsanggre songrango niamgri chalaienggipa ro·ong quarry-rangko chipatna re·angenba, re·bapilengmiting somoio ACHIK Organisation-ni member-rangko Goalgaon songo, dolsa manderang ramao ro·ongrangko danpengsoenba, ro·ong, atte, rua, jompolrangko ra·bae chadrapsoaha aro ua chadrapanio ACHIK member saksa Dilseng M Sangma, rasong gribee so·otako man·aha. Ua a·sel ong·ani ja·man, dos dakgipa manderangko ta·raken rim·china aro rakgipa sastirangko on·china dingtang dingtang dolrang dabiangtokaha.

Us a·sel ong·ani ja·man pulisrang, sakgittam manderangkode, a·sel ong·ani walon rim·na man·aha aro ua sakgittam manderangara, bilsi 47 ong·gipa Rafikul Islam, bilsi 30 ong·gipa Anarul Islam aro bilsi 40 ong·gipa Atowat Islam ong·achim. Ua a·selni bidingo pulisrang sandiangkuenba, bilsi 30 ong·gipa Ariful Islam-koba January 11 tariko rim·na man·aha.

Uandake ua a·selo jak donggipa manderangko pulisrang sandikuenba, Bristibar walo, bilsi 21 ong·gipa Bahadur Sheikh aro bilsi 22 ong·gipa Mozidur Sheikh-koba rim·dapna man·aha.

Indiba niam gri ro·ong quarry-rangko chalaienggipa mandede, pulisrang uni nokona re·angna skangan, kate chakaha aro ua mandeko pulisrang da·onaba rim·na man·kujaenga.

Ua a·selo jak donggipa pilak manderangkon pulisrang rim·na gita sandienga aro ua manderangko ta·raken rim·na man·gen ineba pulisrang u·iataha.