@ghdnews.in@

Tura, Jan 21, 2026: Re·anggipa January 9 tariko, West Garo Hills a·jani Rajabala Pulis Station-ni ning·o donggipa, Goalgaon songo Dilseng M Sangma-ko ka·saninggija so·otanio jak donggipa manderang pilakkon rim·gen ine West Garo Hills a·jani Superintendent of Pulis (SP) Abraham T Sangma, ku·rachakaha.

Da·o dipet ia a·sel ong·anio jak donggipa sak 8 manderangko rim·aha aro ia a·selo jak donggipa manderang pilakkon rim·na gita pulisrang sandienga ine SP aganaha.

SP-ni parakatani gitade, rim·a man·gipa sak 8 manderangoni sakgnide niamgri ro·ong quarry chalaigipa aro bol ratani karkanako chalaigipa manderang ong·a.

Uandake ong·genchimoba, sima ari jolrang gimikon aro West Garo Hills a·jani pilak biaprangon da·o dipet tom·tomenga, ine SP aganaha.

Ia a·selni bidingo am·sandina gita Dadenggre-ni Sub-Divisional Pulis Officer (SDPO) R.A Sangma-ni dilanichi Special Investigation Team (SIT)-ko songaha ineba SP parakataha.

Rim·a man·gipa manderangni mikkangrangko rongtale mesokchina Social Media-rango dabianirangna aganchakatengon, Supreme Court aro High Court-ni dongimin niamrango pangchake, rim·a man·gipa manderangni mikkangrangko mesokna man·ja ine SP talataniko on·ataha.