Williamnagar, March 6, 2026: East Garo Hills a·jani Dawagre aro Dawa Nengsang songni Nokmarang, Civil Society Organisation-rang baksa NGO-rang jekai PGSU, GSU EZ, AHAM, ASPF aro AAYF, Bristibar salo a·dokni Skotong Minister Conrad K Sangma-ko gronge, Dawagre songo bilsi 18 mangna rikgija galchipe donenggipa, Horticulture University-ni bidingo agangrikaha.

Dawagre songo Horticulture University-ko rikna gita, 25.5 hectare a·arangko, 2008 bilsion on·manahachim, indiba da·alona kingkingba Horticulture University-ko chu·sokate on·kujaengani gimin, NGO-rang aro songni Nokmarang suk ong·gijaniko parakataha.

Indake ong·engon, Horticulture University-ko direct on·na man·jani gimin, Agriculture aro Horticulture College-ko kulie on·skagen ine Skotong Minister ku·rachakangenba, ia College-ko rikna gita Budget Session-o napataha ine Skotong Minister agandapangaha.

Uandake, Agriculture aro Horticulture College-ko rika cho·ani kamrangko ta·raken a·bachengatgen, ineba ua aganangaha. Uni nambegipa kattarangna songni nokni manderang uko aro Williamnagar-ni MLA Marcuise N Marak-ko mittelpile aganangaha.

Indake ong·genchimoba, Agriculture aro Horticulture College-ko kulie on·na ku·rachakanichi Dawagre songni manderangnasan ong·aigija, a·dokni manderangna ian mingsa namroro silroroaniko ra·baan baksana, Meghalaya a·doko, Agriculture aro Horticulture-ni pilak kamrango niksenggipa ong·atna dakchakani ong·gen aro game ge·e cha·gipa manderangna mingsa dakchakani ong·an baksana kam ka·e cha·parangna kamrangko bikote on·na gita namgipa chol ong·gen ine NGO-rang aro songni manderang ka·dongskaniko parakataha.

Ia Agriculture aro Horticulture College-o poraina gita sike dongenggipa chatro chatrirangna namgipa chol ba do·ga oe on·ani ong·gen, ine PGSU, Tura NEHU Campus-ni Vice President Joyshelman D Sangma ka·donganiko parakataha.