Tura, June 7,2025: West Garo Hills a·jani Dadenggre-o donggipa Ringgi Chibimako RCC dollong rikenggipa contractor-ni kamrang namen ka·sinenga ine jolni manderang, A·chik Consious Holistically Integreded Krima (ACHIK) dolna badi ka·doatahani gimin, ACHIK Krima Council, RTI ka·e report man·ani ja·man, Krima Council-ni dilgiparang, June 6 tarik Sukrubar salo ua biapona re·ange nieaha.

ACHIK dilgiparangni ua biapona re·ange nion, krongrangko songna gita a·kol cho·e donana agrede, gipin maming kamrangkon nikjaha. ACHIK dolni RTI ka·e, report man·ani gitade, ia dollongna chu·gimik gong 9,15,69,000 tangkarangko chamataha, uanoniko gong 1,27,52,500 tangkarangko okaha aro 2023 bilsini January 3 tariko final work order-ko man·e, kamrangko a·bachengatahachim.

Ia Ringgi chibimako kabatgipa gitcham dollong bilsi ru·utani gimin, namen gitchamaha aro kenchakani ong·engaha. Uni gimin jolo songdongenggipa manderangna ia dollongra nangchongmotgipa ong·enga aro ia dollongko 2024 bilsini July jaon matchotatani ong·achim.

Indiba somoi gita matchotjani gimin, 2026 bilsini January jao matchotatchina somoiko on·daptaiaha ine RTI report-o parakaha.

Indaken, ia Ringgi chibimani RCC dollongko 2023 bilsini July jaon kamrangko a·bachengataha, ine RTI report-o mesokaha. Indiba ia dollongko Dadenggre-ni gitcham MLA aro MIDC-ni Chairman, James Pangsang K Sangma aro GHADC-ni Taxation EM Incharge, Grahambel A Sangma, ia 2025 bilsini March 18 tariko pangchakani ro·ongko songe on·aha.

Ua biapona ACHIK dolni dilgiparang re·ange nion, contractor maming kamrangko ka·gija gong kror 1,27,52,500 koros ong·aha ine tol·enba tangkarangko okaha, ine ACHIK dilgiparang ma·sina man·aha. Ian Dadenggre jolo songdongenggipa manderangni namgnina chamatgipa tangkarangko tol·e cha·bokani ong·enga. Uni gimin okgimin tangkarangko maidake aro maina jakkalahachim, iarang pilakkon, ACHIK dol ning·tue sandianiko dakanggen aro niam gita contractor-ni kosako raka ja·kurangko de·anggen ine ACHIK Krima Council parakataha.