Tura, Nov. 6, 2024:Tura NEHU Campus-ni chatro chatrirangni nangchongmotgipa dabianirangko chu·sokatjaengani gimin jegale, November 6 tarik Monggolbar salo jingjengataniko dakangaha.
NEHU Tura Campus-ni chatro chatrirangni mongsonggipa dabianiarangara, NEHU Tura Campus-o Pro Vice Chancellor-ko songe on·china ru·utbea somoirangonin dabiengachim. Una agreba Campus Director-ko ra·galpilchina aro Campus Director-ko songani maming namgni dongja, ua maming bilkon jakkalna man·jani gimin, NEHU-ni chatro chatrirang jegale, NEHU Tura Campus-ni napram do·gachol mikkango jinma tom·dake jingjengatangaha.
Minggipin dabianirangara NEHU Tura Campus-o contractual basis-o kam ka·giparangna ‘Equql Pay for Equal Work’-ko on·china aro bangbang dongenggipa biaprango joltangni local manderangko kamo rakkichina ru·uta somoirangonin dabiengachim. Indiba, Vice Chancellor chatro chatrirangni dabianirangko knachakteljahani gimin jegale jingjengatangaha.
Apsandaken, Garoland State Movement Committee (GSMC)-ba NEHU Tura Campus-o nanganirangko ru·uta bilsirangonin dabiengachim, indiba knachakjani gimin, NEHU-ni chatro chatrirang baksa jingjengatanio bakko ra·angaha aro je dabianirangko chu·sokatkuja dipetna chakpaaniko on·angpagen, ine GSMC HQ, Tura-ni Assistant Organising Secretary Nikcheng Ch.Marak parakataha.
