@ghdnews.in@

Dadenggre, February 1, 2026: Da·ororo Garo Hills-o so·sojengjeng ong·engani gimin, January 29 tarik Bristibar salo West Garo Hills a·jani Dadenggre jolo songdongenggipa manderang baksa Nokma-Sanirang, Sordar-rang, dingtang dingtang NGO-rang, Senior Citizen-rang, Dadenggre Bajar Committee-ni dilgiparang aro Pulis department baksa nangrime Dadenggre Bajar-o tom·enba da·o ong·enggipa obostarangni bidingo chanchirimangaha.

Dadenggre-ni GSU President Tengsan M Marak-ni dilanichi tom·aniko ong·atangaha aro tom·anio mongsongbate, gipin jatrang ba rorirangni bajaro dongkame, chola ba·ra sikenggipa dorjirangni bidingo, antio changprak bajar cha·enggipani bidingo aro songo noko nape kam ka·enggiparangni bidingo tok tok dake chanchirimaniko dakangaha.

Skanggipa bajar antio dorji ba ba·ra chola sikgiparangni bidingo chanchirimon, da·o skulrang uniform-rangko sikna nangtokengahani gimin aganchangrikon, A·chik jatan ia kamrangkoba dake cha·china tik ka·e, rorirangko re·bana on·kujawa ine jak songe ra·chakangtokaha.

Da·ororo songo noko A·chikrang dingtang dingtang skie ra·aniko matchote donggiparang bang·ahani gimin, uamangna cholko on·skana gita tik ka·angaha.Skul uniform-ni gimin janaptokengon, skul uniform-na batede skie ra·anisa gamchatbata ine agane uniform-kode ka·sin ka·sinba obostarangko nigrike songo noko je dokanrango sikengahachim, uarango skichina didiangaha.

Antio changprak bajar cha·enggipani bidingo chanchirimon, da·o ong·enggipa obostarang namsrangkujaengani gimin, rorirangko re·bana on·kujana aro man·a dipet je bajar antio nanggipa bosturangko A·chikrangan ra·baskae, bading chiwalaniko dakchina aro bolam biterang jedake guerangko breskae badingchina didiangaha. Maina adita salna skangan ISIS-K bobil dolni bimingo New Tura-o poster tape A·chik jatrangna ka·mikenataniko niksoahani gimin anti bajar-rangoba simsakna nangenga aro re·baenggipaa sal somoio ru·utgijan GHADC-ni gita “Whole Sale Market”-ko kulie on·na siengahani gimin, ua biaprangona mamanti bolam bierang aro me·su samjakrangko ra·ange palna man·gen aro ra·baskae badingskana tik ka·angaha.

Indaken songo noko kam ka·e nok rikenggipa rori mistry-rangni bidingo chanchion, uarangni bidingode nok nokgiparang Dadenggre-ni Civil SDO-na lekka see u·iatan baksa uni copy-ko thana-oba on·china aro Nokma-Sanirangna, NGO dilgiparangnaba copy on·china jinma tik ka·e donangtokaha.