Chokpot, July 6,2025: Garo Students’ Union (GSU) Chokpot Regional Unit, Chokpot-oni Tura-ona re·gipa soroko donggipa, Daji dollongko Robibar salo nieaha. Ia Daji dollongko batanggipa bilsi 6 ba bilsi 7-na skangan rikaha, indiba ia Daji dollongko gari re·a bilsi 2-san ong·kuenga. Indiba da·o bilsigni gisepon, cement nosto ong·e binektokaha aro rod-rang be·tonge dollongo nakate dongengaha ine GSU parakataha.

Ia dollongko ja·achi re·gipa aro gario salgiparangna namen kenchakani ong·enga ine GSU Chokpot Regional Unit, parakatenba, salanti re·ruraenggipa manderangni namgnina, ia dollongko ta·rake taripilchina PWD department-ko didiataha.

GSU Chokpot Regional Unit-ni President Jish A.Sangma-ni parakatani gitade, ia dollongko rikna cable, rod aro silittingrangko jakkalaha, ine nikna gita man·aha.

Uni gimin ia dollongko tarigipa ba rikgipa contractor aro PWD department, songregipa manderangni dal·a a·sel ong·na skangan, nadoe ba nakate dongenggipa rod-rangko ta·raken cement-chi repidape ba rod-rangko rattonggale, gital rod-rangko on·e, taridape on·china GSU-ni President, PWD department-ko didiataha.