Tura, March 29, 2026: Tura headquarter-ni Nokma-Sanirang baksa Chokpot jolni nangrimgimin NGO-rang, re·anggipa March 9 tariko bangal rorirang baksa kajia golmal ong·ani somoio Chibinang aro Chandigre songrango nok-jam nosto ka·ako man·e, relief camp-rango dongenggipa bang·a A·chik nokdangni manderangko March 28 tariko grongeaha.

Bangalrang baksa kajia ong·ani somoio Chandigre aro Chibinang songrango donggipa bang·a A·chik nokdangrangan nosto ka·ako man·aha aro ua songni manderang nok jam gri relief camp-rango dongna nangengaha.

Ua manderangni iandakgipa obostao ga·akengako nike, Nokma-Sanirang aro nangrimgimin NGO-rang duk ong·chake, an·tangtangnii man·a gita gilgrime on·gilbaaha aro duko ga·akenggipa manderangna mikkangchi naljokani aro tom·tomani ong·china aro uamangni ramram janggi tangrongbewal gitan sokbapilchina Isolo bi·chake donbaaha.