@ghdnews.in@

Chokpot, Dec 3, 2025: South Garo Hills a·jani Chokpot Community Health Centre (CHC)-o sanna bannanirangko name on·jaenga ine NGO-rangni matnange songbad-rango seatanina, Chokpot CHC-ni Doctor-rang talataniko on·atskaaha.

Uandake, Chokpot CHC-ni kosako NGO-rangni matnangatanina re·anggipa November 27 tariko Chokpot CHC-ni Medical officer-rang aro Doctor-rang Paromgre aro Rekmangre songo Medical Health Camp-ko ong·atangaha. Ua songrangara namen diltubegipa aro ramarang namjabegipa ong·ani a·sel sanna bannaniko ra·na neng·nikaniko man·ronga ine Doctor-rang u·iataha.

Paromgre aro Rekmangre songona re·na chakka ronggni aro chakka rongbrigipa garirangko jakkalna nangan baksana, ua songona re·angon, konta 3 bate somoiko nanga. Uandake diltugipa aro a·silangarigipa biap ong·ani gimin, mobile network-rang aro bijolirang dongja ineba u·iataha.

Paromgre songo nokking 92 nokdangrango manderang sak 503 aro Rekmangre songo nokking 42-o sak 344 manderang gnang. Ua songrango manderang bang·ani gimin sanna bananiko ra·na re·batokgen ine ka·dongenba, November 27 tariko Chokpot CHC-ni Doctor-rang ua songrangona re·angtokaha ine u·iataha.

Unbaksana, salanti re·rurana ba antio changprak dake re·angna altubea ong·ja, ine parakataha. Wachini somoio ramarang namjani a·sel re·na dona man·jani gimin, bilsini May ba April jarangosa Camp-ko ong·atna ga·aka ineba u·iataha.

Indake November 27 tariko Doctor-rangni ua damgni songrangona re·angani somoio bi·sa saksa ramao a·sel ong·ako Chokpot CHC-ona ra·baaha. Ua somoio Doctor aro Nurse-rang ua bi·sana sanna bannaniko on·aha. Indiba, bilongbee saknaahani gimin, uko nambata sanna bananiko on·na nangaha. Indiba Chokpot CHC-o X-ray aro CT scan machine-rang dongjani a·sel, ua bi·sako Tura Civil Hospital-ona watataha.

Indake ong·genchimoba, ua bi·sa be·en ning·o bilonge saknaako man·ahani a·sel, ua bi·sa November 29 tariko Tura Civil Hospital-o janggi galaha ine parakataha.

Uandaken gisiko nange, sanna bananiko on·ani kosakon sanna bannanirang namja, name kam ka·ja aro nirok simsakja ine matnanganiara an·seng baljokanina kam ka·enggipa dolrangko namen gisiko saatani ong·aha, ine doctor-rang suk ong·gijaniko parakataha.

Indake gisikni gita ong·aigija be·en bimang aro gisiko chanchianirang salantian dangdike on·enggiparangna dongtogijako ra·baa ineba parakataha.

Minggipin obosta chong·motan an·o donggipa ma·gipa saksani siani gimin janapatenba, iani bidingo Dr. Jaison N. Sangma-ni dilanichi am·sandiako dakenga, jekon Human Right Commission-ni u·iatani gitade, ANM Nurse-ni nirokjani a·sel ong·aha. Ua obostani bidingo, Senior Medical Health Officer In-charge, District Administration aro DM&HO-na Report-ko on·atmanaha ineba parakataha.

Indake ong·engon, dingtang dingtang nanganirangko, NGO-rangni bimingo manderang dabitokenga, ine doctor-rang janapatenba, picnic aro rally-rangna tangkarangko gilenga, health department-ni ning·o contract-rangko am·enga aro mandetangko CHC-o rakkichina sinjetaniko on·enga ineba parakataha.

Ua dabianirangko chu·sokatna man·jani a·selan CHC-o kam ka·giparangko sanna bannanirang namjaenga, kamtangona re·bajaenga ine matnangatenba, namgija bimingko man·atna, uamang kakket ja·pangko sandichenggija, Social Media-rango gatate jangbingbangatenga ine Doctor-rang parakataha.

NGO-rangni indake dakanirangko chakna nanggenchimoba, Chokpot CHC-o kam ka·giparang kamtangko name ka·enga. Unikoa, CHC-o rongtalani, mande ra·ani, dangdike on·anio namdaproroani aro sanchakram biapo bi·sa an·pakani batroroenga aro sanna bannaniko ra·na sokbagipa manderang namen sanna bananiko man·enga ineba parakatskaha.

Songsalna namako chanchigipa NGO-rang aro manderang maming saloba an·tangtangni nanganirangna dabirongja aro mitamrang an·tangtangni namgnina rikgiparangsa kakket ong·gijagipa koborrangko tol·e uamangni kosako gipatenga ineba parakataha.

NGO-ni bimingo kam ka·giparangko gipin biapchi apjitatna ka·mikkenataniara namen, chaktogijani aro ka·a be·ataniko ra·bagipa ong·a ineba doctor-rang parakataha.

Songsalna aro manderangna sanna bannaniko nambatatna bimchipe kam ka·anina uamangni man·pilskaani dongama ine doctor-rang sing·doatskaaha.

Mikkangchi indake ong·taigenchimode, kam man·bagipa dambe Doctor-rangna ka·a be·ani on·gen aro sanna banani a·bao kam ka·na sikgiparang ka·dongani gri ong·gen. Kakket ong·gija kattarangko tol·e sakki on·anirangko giproroatani a·sel bang·bata changon, okkimu chake aro gisik neng·e kam ka·na nangao sokenga ineba parakataha.

Unbaksana, pilak doctor-rang mande ra·ako man·a kragipa aro uamangna dingtang dakteaniko ba boksisko nangja, indiba doctor-rangko mande ra·pachina mol·molataha.

Chokpot jolosan ong·aigija gipin diltugipa biaprangona sokangon, manderangni namgnina kamko dangdike on·enga. Nangchongmotgipa somoio darangkoba mikkang niteani gri dangdike on·enga, jeon, uamangni ku·mitcheta gitan manderangni janggiko jokatna aro namatpilna bil ama dipet dangdike on·enga ineba doctor-rang parakataha.