Tura, Mar 14,2025: A·chik Dedicated Integrity Leaders (ADIL) Garobadha Regional Unit aro Rerapara Block Development Officer (BDO) baksa bakrime, March 13 tariko South West Garo Hills a·jani Rerapara block-ni ning·o donggipa Koraitola songo Awareness Program-ko ong·atangaha.

la Program-o Garobadha-ni dol 7 NGO-rang jekai AYWO, ADE, AHAM, FKJGF, ASPF, ACHIK, FAF bak ra·angaha. Unbaksana Garobadha PHC Medicals Team, Forest Garobadha Beat, Swatch Bharat aro Garobadha Investigation Centre-ba bak ra·angpaaha.

ADIL Garobadha Regional Unit-ni President Dean Marak biapo ra·e, Program-ona sokbagiparangko kusi ong·e rimchaksoani kattarangko agane, Program-ni miksonganirangko talatangaha. Maini gimin chiring chibisiko rongtale rakkina nanga, uani gimin Meckensing Sangma AYWO Garobadha Regional Unit-ni President songni nokni manderangna talatan baksa rongtal an·talaniko rakkiangchina songni nokni manderangko didiangaha.

Garobadha Investigation Centre-ni Second IC Sixner A Sangma-ba program-o dongpae, an·ching chiring chibisiko rongtale rakianichi mandena aro mikkangchi re·baenggipa dedrang mai dakgipa namgniko man·gen ba on·gen talatan baksa agan ku·pattiangaha.

Garobadha PHC-ni Dr Balnamchi Sangma-ba rongtal an·talgija donganichi bang·a sabisirangko man·na ama aro bangbango a·pal re·ramramachi songsalna an·seng baljokaniko ra·bana man·ja aro dingtang dingtang sabisirangko man·na ama. Tampirang, chirang aro balwarango manderang bang·a sabisirangko man·a ine aganangskaha.

Swatch Bharat-ni Thysing Sangma toilet ba paikanarangko rikna badia office-oniko man·gen aro maidake apply ka·na nanga, uarangni gimin aro maidakgipa scheme-rang donga, agan-talate on·nangaha.

ADIL-CEB-ni President Franchise C Marak chiring chibisikara baditana kingking gamchata aro chiko maina nanga chiringko maina nanga uarangni gimin talate on·angskaha.

Rerapara Block-ni BDO Arman Ch Momin bang·a songo noko jabolrangko skatang galramramaniko maidake dingtangatgen aro maidake sorkarini on·gipa scheme-rangko man·gen, uarangni gimin agan ku·patie on·angan baksa toilet-rang nokantion dongna nangchongmaota ine agadapangaha.

Bon·kame, ADIL Western Zone-ni General Secretary Sengkambal Sangma-chi mittelpilani kattarangko agane, uni ku·rangchin Isolo bi·e program-ko matchotataha.