Tura, Oct 4, 2024: West Garo Hills a·jani ning·o donggipa Chibinang Primary Health Centre (PHC)-o sagipa manderangko salrurana ambulance gari dongjani a·sel jolo songdongenggipa manderang namen neng·nikanirangko chagrongna nangtokengani gimin, Chibinang jolni nangrimgimin NGO-rang jekai GSU, ADIL, ASPF Chibinang Unit, FAF aro AHAM, West Garo Hills a·jani District Medical & Health Officer (DM&HO)-na chitti sedoatenba Chibinang PHC-na gital ambulance bolsako on·atchina a·dok sorkariko mol·molataha.
NGO-rangni West Garo Hills a·jani DM&HO-na sedoatani gitade, Chibinang PHC-ni ning·o dam 63 songrang donga, indiba Chibinang PHC-o ambulance gari bolsaba dongjani a·sel sagipa manderangko salruraanio namen neng·nikanirangko man·tokenga. Nanggitikan somoio sagipa manderangko ta·rake PHC-ona sokatna gita private garirangko ba para garirangko jakkalna nangenga aro basakobade gure garirangkosa jakalna nangenga ine Chibinang jolni dol 5 NGO-rang parakataha.
Chibinang PHC-ni ning·o dam 63 songni manderangna sanna bananirangko on·anio da·alonaba kingkingba Chibinang PHC-o ambulance gari bolsaba dongkuja. Uni a·sel songni nokni manderang, sagipa manderangko salrurana namen neng·nikanirangko man·tokenga, ineba NGO-rang parakataha.
Uni gimin, Chibinang jolo songdongenggipa manderangni namgnina chanchie, gital ambulance gari bolsako Chibinang PHC-na ta·rake on·atpachina NGO-rang, West Garo Hills a·jani DM&HO-ko didiatan baksana, a·dokni Health & Family Welfare Minister aro joltangni MLA, AT Mondal-na chitti sedoataha.
