Baghmara, Oct 7, 2024: South Garo Hills a·jani Gasuapara block-ni ning·o ga·akgipa Ruga jolni manderang October 4 tariko mikka bilongbee waani a·sel a·a rua, chi bana re·anichi neng·nikaniko chagrongna nangtokenga ine FKJGP Gasuapara Circle-ni President Kalsrang Marak u·iataha.
Kalsrang Marak-ni u·iatani gitade, Ruga jolo nok te 13-rang chi ripe nosto ong·atako man·aha. Unbaksana Ruga bajarni dokkanrang, rama sorokrang, mi a·palrang aro bagan barirang bang·en nosto ong·ako man·aha. Una agreba Ruga-oni Chokpot-ona re·gipa Ruga Donigre bolni dollongko chi man·pakangaha, gital rikgipa dollongko re·na gita a·a gata matchotkujani gimin jolni manderang re·a doanio namen neng·nikaniko chagrongtokengaha.
Apsandaken, Ruga-oni Dimapara-ona re·gipa sorok gimikon a·arang be·dapani a·sel bajar anti re·rurana man·jae neng·nikaniko man·enga aro bijoli dongjani a·selba kobor ra·grikna man·jae neng·nikbeani ong·enga. Ruga bajarko chi ripanichi dokkanni bosturang nosto ong·tokahani gimin mirong, rasin, dal, chini, kari aro gipin nangchongmotgipa bosturangko man·na neng·engaha. Cha·anirangko ra·na gita gipin bajarrangchi re·angna gitaba rama jal·lang nosto ong·tokahani gimin, re·rurana man·jae neng·nikaniko man·engaha ineba FKJGP dilgipa u·iataha.
Iandakgipa obostarang ong·gen ine darangba u·isojani gimin, simsaksona man·srapjaha, walni somoiosa rang·gitik chirang dal·bae nok jam, rama sorok aro bagan barirangko nosto ong·ataha. Indake salgnini mikka jimpretani a·sel, Chokpot-ni MLA Sengchim N.Sangma-ni nokkoba chi ripaha ine koborna u·iataha.
