Tura, Nov 28,2024:Chang 12-gipa Garo Hills Autonomous District Council (GHADD) Session-ko November 26 tarikoni a·bachengataha. Indake skanggipa salni session-o sianggipa dilgiparangko gisik ra·e maniangaha.
Uandake gnigipa salo je Motion-ko Move ka·na warachakenggipa dolrang ra·bahachim, GHADC-ko chalaienggipa CEM Albinush R.Marak apsan Official Motion-ko ra·baha aro ua Motion-rangko ruling aro opposition dolrang apsan ra·chakenba, November 28 tariko chanchirimna ba table ka·na tik ka·aha ine Williamnagar-ni MDC Alphonsus R.Marak aganaha.
Alphonsus Marak-ni aganani gitade, je Motion-kon opposition MDC-rang a·bachengonin dabibaengachim, uarangara Codification Garo Customary Law (GCL), Seperate Electiontoral Roll (SER)-an mongsonggipa ong·achim. GCL-ko re·anggipa 2022 bilsio table ka·e, nipiltaianiko daka matchotaha, uko November 28 tarik Bristibar salo jinma apsan chanchie final ka·anggen. Ia SER Motion-ko Move ka·na 12-gipa Session-o warachakenggipa dolrang ra·bataiahachim, indiba apsan Official Motion-kon ruling dolni C ra·baha aro uko Session-ni gittamgipa salo table ka·na ba chanchirimna tik ka·aha. Indiba SER-ko final ka·na man·kujawa, maina iako kam ka·na gita Committee-ko songani ja·mano sako sako Committee Member-rang dongen, ruling EC-osa pangchakaignok. Ia SER Motion-ko da·alosa table ka·na ba chanchirimna ruling aro opposition dolrang jinma apsan ra·chakaha. “Anga ia A·chik jatni dakna nangchongmotgipa Motion-ko da·alo table ka·na ra·chakahani gimin, dingtangmancha GHADC-ni CEM Albinush R.Marak-ko mittela, ian A·chik jatni namgnina chanchiani ong·gen” ine Marak aganaha.
Una agreba, Constitution of District Council Amendment, 2024-ko Amend ka·na aro Trading Licence for Non Tribal (TNT) Amendment-ko dakna gitaba ia Session-o Motion-ko ra·baha ine Marak parakataha.
