Tura, Nov 14,2024: West Garo Hills a·jani Raksamgre jolo donggipa Bolchu Katonggre Govt. LP Skulni Head Master, bilsi 15 mangna batpile kamtangko ka·chipgija dongenga ine A·chik Conscious Holistically Integrated Krima (ACHIK) Council Raksamgre Regional Unit, November 12 tariko a·dokni Education Minister Rakkam A Sangma-na badi ka·e lekka sedoataha.

ACHIK Council Raksamgre Regional Unit-ni Education Minister-na badi ka·doangani gitade, West Garo Hills a·jani Bolchu Katonggre Govt. LP skulni Head Master Poresh M. Sangma bilsi 15 batpile kamtangko ka·gija dongenga ine parakataha.

Bolchu Katonggre Govt. LP skulni head master Poresh M.Sangma-ara Assam a·dokni Goalpara district-o donggipa Bamindangga Lemakona songoni ong·achim, ua kamtangko ka·gija dongchipengani gimin, uni biapo dakchakgipa skigipa ba Assistant Teacher saksan skigipani kamko ka·enga ine ACHIK Council Raksamgre Regional Unit parakataha.

Poresh M.Sangma maini gimin, an·tangni kamko indita bilsirangna ka·gija dongengani a·sel songni manderangna aro skulo poraienggipa bi·sarangna dal·bea gimaani ong·engaha. Uni gimin Poresh M.Sangma-ni bidingo ta·raken sandianiko dakenba, uni kamko bon·atna nanga aro uni palo gipin skigipako rakkiskachina, ACHIK Council Raksamgre Unit aro songni manderang dabiangaha. Uni gisepon Poresh Sangma-ni kosako maming ja·ku de·aniko dakjagenchim ong·ode, mikkangchi rakbata ja·kurangko de·angskagen ine ACHIK Council aro songni manderang parakataha.

“Chinga changni chang Poresh Sangma-ni kosako jegale lekkarangko sedoatahachim, indiba department da·alona kingkingba Poresh Sangma-ni kosako maming ja·ku de·aniko dakkuja. Chinga uko kam join ka·pilchina gitaba cholko on·aha, indiba ua an·tang kam ka·gija, sakgipinkosa watatskaha. Maini gimin Poresh Sangma Bolchu Katonggre Govt. LP skulo kam ka·na sikjaenga, chingna talataniko on·china aro uni palo gipin skigipako appoint ka·e on·china chinga Education Minister aro department-ko mol·molna sika. Uandakgipa skigipako chingna nangja, uni palo gipin skigipako chingna nanga” ine ACHIK Council aro songni manderang dabiangaha.