New Delhi, May 7, 2025: Pakistan a·songni bobil dolrang Pahalgam-ko chadrape, ramram manderangko skatang so·ote galani ja·man Indian Army, Pakistan aro Pakistan Occupied Kashmir (PoK)-o bobil dolrangni ma·chakenggipa dam 9 biaprangko, “Operation Sindoor’ ine bimingko done, silairangchi aro bomarangchi chadrapna a·bachengatskaaha.

Indian Army-rang May 7 tarik Budbar pringwalni 1:05 bajimango chadrapna a·bachengaha aro dikdiksani gisepon, matchotataha.

“Operation Sindoor”-ko dingtangmancha Pakistan-ni bobil dolrangko a·jak sokna nisan done, Prime Minister Narendra Modi biming donaha. Iani bidingo talatangengon, Intelligence-ni u·iatanio pangchakesa, bobil dolrangni dongnuenggipa biaprangko bomarangchi goe chadrapanio, ramram manderangko nangchakejana nisan ka·aha ine Budbar pringo, India a·songni Foreign Secretary Vikram Misri parakataha.

Misri-ni parakatani gitade, 1971 bilsio Pakistan baksa dakgrikaoni ian skanggipa India-ni Tri-Service Operation ong·aha. Pakistan a·songo bobil dake chakatgipa dolrang, changni chang India a·songona re·bae, dos gri ramram manderangko so·ote galengani giminsa, da·alo bobil dolrangni dongnuchakenggipa biaprangko chu·gimik nisie galskana ‘Operation Sindoor’-ko a·bachengataha.

Re·anggipa April 22 tariko Pahalgam-ko chadrapanio bang·bata manderangkon bobil dolrang, skorangosa goe galahani gimin a·jak sokskana gita, ‘Operation Sindoor’-ko ka·aha ine Foreign Secretary parakataha.

Budbar pringwalo Indian Army-rangni chadrapgipa biaprangara, Lashkar-e-Taiba, Jaish-e-Mohammed aro Hizbul Mujahideen-ko man·chape, Pakistan a·songo bobil dake chakatgipa dingtang dingtang dolrangni biaprang ong·a ine me·chik Army Officer-rang, Colonel Sofiya Qureshi aro Wing Commander Vyomika Singh parakataha.