Tura, March 29, 2026:: Garo Hills Autonomous District Council (GHADC)-o on·enggipa a·a pattana dongimin somoi ia March jani 31 tarikon bon·engahani gimin, a·a patta donggipa pilak manderangkon, April 1 tarik dipet an·tangtangni a·a pattarangko ‘Renew’ ka·china ba gital dake taritaipiltaichina, GHADC-ni Executive Committee (EC) u·iataha.

GHADC-ni a·a pattarangko 1886 bilsini Assam Land & Revenue Regulation-o pangchake, bilsi 10-prakna tarie on·aha aro ia dongimin somoi, ia March jani 31 tarikon bon·engahani gimin, 2026 bilsini April 1 tarikoni 2036 bilsini March 31 tarikona gital dake a·a pattarangko tarina nangengaha ine GHADC-ni Executive Membor (EM) aro Garo Hills United Alliance (GHUA)-ni ku·wattimgipa, Cherak W Momin parakataha.

GHADC-ni a·a patta donggipa pilak manderangkon, April 1 tarikni gisepon GHADC-ona re·bae an·tangtangni a·a pattarangko bilsi 10-na gital dake taritaichina aro gamna nanggiparangko gamchina, Momin didiataha.

Indake ong·engon, GHADC-ni Delimitation Committee-na songgimin gitcham Chairman, a·gilsakko watangahani gimin Sukrobar salo, Executive Committee (EC) tom·aniko ong·atange, Delimitation Committee-ko dilna gital Chairman-ko songani gimin chanchirimaha, ineba Momin parakataha.

“Delimitation Committee-ni Chairman da·o dongjahani gimin bangbang ong·e dongkuenganina Executive Committee tom·e chanchirimaha aro District Council Affairs (DCA) department, Governor-ni namnikanio pangchake, gital Delimitation Committee-ko songe on·ani ja·man kamrangko ka·angna tik ka·aha,” ine GHADC-ni EM Cherak W. Momin parakataha.