@ghdnews.in@

Tura, Jan 11, 2026: January 9 tarik Sukrobar salo Rajabala-ni Bhaitbari Goalgaon songo rang·gitik kenbegipa a·sel ong·ani bidingo tom·tomaniko ra·bana miksongenba songgigrikaniko dakna gita, West Garo Hills a·jani Deputy Commissioner (DC) Vibhor Aggarwal, Sonibar salo Tura Circuit House-o tom·aniko ong·atanio, West Garo Hills a·jani Superintendent of Pulis (SP) Abraham T. Sangma, gipin official-rang, toromko dilgiparang, aro songsalko dilgiparang dongpae bak ra·angaha.

Unbaksana, Tura Central Puja Committee (TCPC), Tura Mosque, Senior Citizens Forum, Tura Mothers’ Union aro dingtang dingtang NGO-rangni dilgiparangba tom·anio bak ra·angtokaha.

Ia chanchirimanio bak ra·gipa sakantian jatsa jatgipin baksa meli nangrimgrike dongna aro tom·tomaniko rakkina ku·rachakangtokengon, toromko aro songsalko dilgiparangba, chu·gimik District Administration baksa bakrimna aro tol·e jangbingbangatgiparangoni naljoke dongna kang·kare kae ra·angtokaha.

Indake ong·genchimoba, sianggipa mandena kakket bichalko ra·bana ku·rachakan baksa, Rajabala aro Phulbari-oba apsan daken tom·tomaniko rakkina tom·aniko ong·atenga ine Deputy Commissioner parakataha.

Uni gisepon Superintendent of Pulis Abraham T Sangma-ba, ia a·selni bidingo mokordomako segataha aro jak donggipa bang·a manderangni nokko Pulisrang chadrapaha aro kate chakenggipa quarry nokgipako rim·na Pulisrang krenge kamko ka·enga ine aganangaha.

Ia a·selni bidingo saoba Social Media-rango tol·e jangbingbangatgenchimode, uamangni kosako rakgipa ja·kuko de·anggen aro pulisrangni kakketgipa koborko man·sokuja dipet tol·e agananirangko bebe ra·na nangja ine songdongenggipa manderangna mikkrakataniko on·angaha.

Indake, a·jani dingtang dingtang bakrango Pulisrangko donataha aro uasan ong·aigija sima ari gita napsrukbaaniko champengsona man·na gita Assam Pulisnaba koborko on·ataha ineba ua agandapangaha.

Iarangna agreba bostuni damrangko bate pala sim·aniko daknaba donga ingipao Bazar Committee-rang nirok sandianiko dakchina Supply Department-oni u·iataha ine Deputy Commissioner parakataha.