Tura, Feb 24, 2026: A·chik State Peoples’ Front (ASPF), HQ Tura, re·baenggipa GHADC election-o susana Garo ong·gijagipa (Non-Garo), chong·motan gipin jat candidate-rangna dolgittam political dolrang party tikit on·ahani gimin, suk ong·gijaniko parakatenba, Garo ong·gijagipa candidate-rangna on·gimin, party tikit-rangko ta·raken ra·galpilchina dabie, NPP National President Conrad K.Sangma, Meghalaya Pradesh Congress Committee (MPCC)-ni President Vincent H.Pala aro Meghalaya Pradesh Trinamool Congress (TMC)-ni President Charles Pyngrope-na sedoataha.

Re·baenggipa GHADC election-o susana Garo ong·gijagipa candidate-rangna party tikit-rangko on·na man·jawa, ine A·chik gimiko jegalaniko dakengon, manigija NPP, Congress aro TMC, 14-Betasing constituency-o sakgittam gipin jat candidate-rangna party tikit-rangko on·aniara ra·chakna man·gijani ong·a aro A·chik jatni kosako re·ani ong·a, ine ASPF-ni General Secretary Bernita R.Marak parakataha.

Dolgittam political dolrangni gipin jat candidate-rangna party tikit on·giparangara Sanjay Koch (NPP),
Ajitav Koch (INC) aro
Hemandra Hajong (TMC).

Garo Hills-de A·chikrangni a·jasa ong·ani gimin, A·chik a·songni manderang apsan ku·monge, ia chango Garo ong·gijagipa candidate-rangni GHADC election-o susapaaniko bilaken warachakenga. “Uni gimin, chinga na·aimangni chanchie nipiltaichina mol·molatenga. Chinga ka·donga na·simang, A·chik a·song aro jatni namgnina chanchie, Garo ong·gijagipa candidate-rangna on·gimin party tikit-rangko ra·galpilchongmotgen aro jatni nangnikako ra·chakgen” ine Marak parakataha.