Tura, May 14,2025:Tura-ni MDC aro BJP-ni State Vice President Bernard Rimpu N.Marak, Garo Hills Autonomous District Council (GHADC)-o bang·en tangka paisarangko jakkalsretenga ine matnangenba, iani bidingo sandirokanirangko dakchina a·dokni Director General of Police (DGP)-na badi (FIR) ka·doataha.

Marak-ni May 2 tariko badi ka·doangani gitade, Sumit Kumar Jain Bohra minggipa saksa, an·tangko Chartered Accountant (CA) ine tol·enba, GHADC-o Consultant-ni kamko ka·enga aro unan bang·a tangka paisarangko jakkalenga aro GHADC-o kam ka·giparangnan dormaha on·na man·piljaenga.

Indake ia mandeko GHADC-o tol·gipa CA-ko rakkiani a·sel tangkarangko jakkalsretani aro 2014 bilsio ANVC baksa sonngigrikanio soi ka·grike ma·mong sorkarini chamatgipa tangka paisarangko jakkalsretaha ine Marak, DGP-na sedoatgipa badi ka·gipa chittio parakataha.

GHADC-o tol·e songako man·gipa Consultant, Sumit Kumar Jain Bohra, CA-ni Degree Certificate-ba dongja aro Non Tribal-rangni Council-o tarina nangtelgipa Trading for Non-Tribal (TNT) Licence-ba dongja. Ia mandeko GHADC-ni Consultant dake rakkianiara niamni a·palo ong·a ineba Tura-ni MDC parakataha.

Kajinarangko gamjani gimin, Central GST Department-ni Show Cause Notice on·ani bidingoba Marak badi ka·anio, DGP-na janapataha.

Marak-ni badi ka·anio parakani gitade, Jain Borah-na GHADC, gong kror 8 batpile tangka paisarangko, changgittam dake on·na songgigrikaha aro dolgnini Memorandum of Understanding (MoU)-o soi ka·grikani gitade, GST liability-o gong kror 32.04-mang ong·pilengaha.

GHADC-o tangka paisana neng·nikanirangko man·engani a·sel kam ka·giparangna ja 34 mangni dormaharangko on·na man·kujaengon, GHADC-ni dilgiparang, tol·gipa CA-ko Consultant dake rakkienba tangka paisarangko gamskaenga ineba Turani MDC parakataha.