Tura, Mar 18, 2025: Garoland State Movement Committee (GSMC), All A·chik Youth Federation (AAYF), FKJGP aro gipin NGO-rang Sombar salo Hallidayganj Pulis Station-ni ning·o donggipa, Nawalgre A·king Nokmani Batabari Baptist Mondolina on·gipa a·a bigha 7 mango niamgri napdrae songdong a·chaenggipa biapko nina re·angaha.

NGO-rangni parakatani gitade, wachini somoio chi banna re·ani gimin gipin jatrang ua biapona relief camp dongna re·bae, chi banna re·ani ja·manoba ua biaponi re·angpiljaha aro uano dongkamaiaha.

Uni ja·mano Giljani manderang ua biapona re·ange nion, bang·a gipin jatrang napdrae songdonganiko nike, Garo Hills Autonomous District Council (GHADC)-na badi ka·doahani gimin, District Council, enquiry ka·e niamgri songdong a·chaaniko nike 2007 bilsini July 30 tariko nok te 8-rangna skanggipa eviction notice-ko on·ahachim, indiba gipin jatrang ua biaponi re·anggija indita bilsina kingking dongenga.

Uni ja·manoba, District Council baditaba changna eviction notice-ko on·taiaha, indiba da·alona kingkingba ua biapko wate re·angkuja, batesa gipin jatrang re·badapdape dongenga.

“Chinga March 17 tarik Sombar salo GHADC-ni Officer-rang, Hallidayganj-ni Pulisrang, dingtang dingtang NGO-ni dilgiparang baksa nangrime, ia biapona re·bae re-enquiry ka·taiaha, indiba da·alona kingkingba, gipin jatrang ua biapko wate re·angkuja aro ua biapo nokdrang te 24 mang dongkuenga” ine GSMC CEC, HQ-ni Organising Secretary Jason Tekrang M.Sangma parakataha.

Uni gimin GSMC, AAYF, FKJGP Rajabala Circle aro gipin NGO dilgiparang changsatai GDC-na lekka sedoatetaiaha. Ua biapo songdongenggipa gipin jatrang Batabari Baptist Mondolini a·a patta tarimangiminko nokdang te 5-rangde, Mouza No.6-o pangchake a·a patta tariaha ine sakkirangko man·aha. Uni gimin, GHADC-ni bil gnanggipa dilgiparang, A·chik A·king-rango gipin jatrang niamgri napdrae, a·a pattarangko taridrae songdong a·chaniko aro A·king Nokmani Batabari Giljana on·gimin a·ako ra·sekdrae, Mouza No.6-o pangchake tarigimin gipin jatrangni a·a pattarangko, Indian Constitution-ni Sixth Schedule-na on·gimin bilo pangchake, GHADC-ni niam gita ta·raken den·galpilchina ba a·rikgalchina NGO-rang raken dabiangaha.