Ampati, Nov 5, 2024: Re·anggipa adita jarangna skang Bangladesh a·songo so·sojengjeng kajia ong·ani ja·man, Bangladesh a·songni manderang niamgri Meghalaya a·dokona katnapbagiparang batroroengon, Sombar pringni 6 bajimango niamgri napbagipa sak 7 manderangko South West Garo Hills, a·jao donggipa Boldamgre songni manderang rim·na man·aha.

Rim·a man·gipa sak 7 manderangko Boldamgre songni manderang Kalaichar Patrol Post-ni Pulisrangna pakwatataha.

Rim·a man·gipa manderangara Bangladesh Kurigram a·jao donggipa Balimara Beparipara songni bilsi 20 ong·gipa Angur Hussain Afrib, Baparipara songni bilsi 35 ong·gipa Amir Ali, Bokbanda songni bilsi 60 ong·gipa Chand Miah, Beparipara songni bilsi 32 ong·gipa Md Bukul Miah, Romna Beparipara songni bilsi 45 ong·gipa Mir Jahan, Jhorgas Beparipara songni bilsi 35 ong·gipa Md Rasel Ali aro Romna Beparipara songni bilsi 35 ong·gipa Biblop Miah ong·achim.

Pulisrang ua manderangoniko Bangladesh-ni pass-port, tangka, mobile phone-rang aro Bangladesh a·songni SIM-rangko man·aha. Iani bidingo pulisrang Mahendraganj Pulis Station-o mamlako segataha.

Bangladesh a·songo so·sojengjeng ong·anirang namsrangkujaengani gimin, dokkol ka·ako man·gipa manderang a·song damgnini sima ari gita Meghalaya a·dokona napsrukbana jotton ka·engachim.

India aro Bangladesh a·songni sima arirango silchekchi bera kadulahaoba, niamgri napsrukbaaniko champengna jotton ka·engon, Bangladesh a·songni manderang niamgri Chibimarang gita, a·brirang gita aro dikbegipa buringrang gita napdrabana man·enga.

Indake Bangladesh a·songni manderang India a·songona niamgri napdrabagen, ine ma·sisoenba, sima ariko nitimgipa BSF sipairang aro Meghalaya Pulisrang dingtang dingtang biaprango nirok sandianiko dakenga. Indiba batanggipa jasani gisepon, niamgri napsrukbagipa Bangladesh a·songni manderangko Garo Hills-o bang·en rim·sona gita man·aha.