Shillong, Aug 28,2024: A·dok sorkarini dingtang dingtang department-rango bangbang ong·enggipa aro sanction ka·gimin kamrangko gapatna gisiko nangjaenga ine Mongolbar salo, warachakenggipa Trinamool Congress (TMC)-ni dilgipa Dr.Mukul M.Sangma, a·dok sorkariko matnangataha.

“Sorkarini miksonganirangko anga sing·na sikenga. Sanction ka·gimin bangbang ong·e dongenggipa dingtang dingtang department-ni kamrangko gapatna gita maini gimin sorkari gisiko nangjaenga” ine Assembly-ni Autumn Session-o Dr. Sangma sing·doangaha.

Ampati-o donggipa sorkari skulni gimin, janapatengon, “Sanction ka·gimin post-na gong 30,000 dormahako on·e kamo rakkina gitasa advertisement-ko on·aha, maini gimin niamni a·palo ong·enga” ineba Dr. Sangma sing·doangaha.

Sanction ka·gimin post-rangni kosako Supreme Court-ni rai on·aniko janapatskaengon, “Maini gimin anga gong 30,000-kosan man·na nanga? Ian ra·seke ra·anisa ong·enga” ine TMC MLA aganaha.
Indake bangbang ong·enggipa kamrangko sorkari, mainaba miksongmanchaesa gapatjaenga aro sorkari mikrakatanirangko knachakjaenga ine Dr. Sangma aganaha.

MPSC-ni result-rangko parakanio niamko pe·ani gimin janapatengon, da·roro somoirango kamna ra·ani bewalrang niam gita ong·jaenga aro iako ta·raken namatna nanga ineba Songsak-nj MLA aganaha.

East Garo Hills a·jao District Selection Committee (DSC)-ni gita kamna ra·anio nokdang ge·sani sakbri manderang pass ka·ahani giminba Dr. Sangma sing·doangaha.

Skango ritchani ritcha contractor-rang, a·dokni dingtang dingtang sorkari department-rango kamrangko ka·na gita cholrangko man·achim, indiba da·alo obostarang namen dingtangaha ineba Dr. Sangma, suk ong·gijaniko parakataha.

“Batanggipa 2018 bilsionin a·doko namen dingtanganiko nikna man·aha, maina skangode an·chingni chonchongipa contractor-rangba dal·dala kamrangko ka·e cha·pana cholrangko man·achim, indiba da·ode contractor-rang kamkon man·na neng·engaha” ine TMC-ni dilgipa aganaha.