Tura, Aug 27,2024:A·chik State People’s Front (ASPF) HQ, Tura Bajengdoba-oni Borjhora-ona ramako ta·rake taridapchina mol·mole a·dokni Skotong Minister Conrad K.Sangma-na August 26 tarik Sombar salo lekka sedoataha.

North Garo Hills a·jao donggipa Bajengdoba-oni Borjhora-ona dakanggipa rama namjani gimin, ta·rake taridapchina ASPF a·dokni Skotong Minister-ko mande ra·bean baksa seachi mol·molataha.

Ramarang a·klokrara dake namjani gimin, songre songgabatgipa manderang aro salantio re·rurae janggi tangenggipa jolni manderang minit 40 re·na nanggipa ramako konta 2 re·na nangenga ine janapataha.

Ia jolni MLA-ba NPP dolonin ong·a aro ia ramako manderang Bajengdoba-oni Borjhora-ona re·ange salanti bading chiwale janggi tangenggipa manderang aro songtango man·gipa bolam biterang, me·su samjakrang aro gipin bosturangko a·dok gipinona ia gitan watatani gimin mongsonggipa rama ong·a ine ASPF-HQ-ni General Secretary Bernita R.Marak parakataha.

Ia rama Garo Hills-o songdongenggipa manderangna dilsa mongsonggipa ong·a aro ian NH-51 sorok Bajengdoba-oni Rongsai AMPT sorokona soktike, Borjhora-ona, Assam aro Meghalaya a·dokni sima ari jolo donggipa, Rongsai gita bading chiwalanio bijangchigipa biap ong·ani gimin, manderang salantian ia rama gita re·rurana nangenga.

Garo Hills-o game ge·e cha·gipa manderang an·tangtangni man·enggipa dingtang dingtang bolam biterang jekai te·rik, anaros, gue, rubber aro gipin bosturangko pala sim·na gita ra·ruraanio mongsonggipa rama ong·a ineba Marak janapataha.

Indake ong·engon, rama namjani a·sel songregipa aro salanti re·ruraenggipa manderang namen neng·nikaniko man·enga. Indiba ia ramarang namgenchimide, pilak bosturangko pala sim·anirango aro bading chiwalanirango tangka paisa man·anirang tang·dogen aro direct a·kawe jolni rama gita Assam-ona re·angna altubegipa ong·genchim, ineba ASPF dilgipa janapataha.

Uni gimin, jolo songdongenggipa aro songre songgabatgipa manderangni namgnina, chanchie Bajengdoba-oni Borjhora-ona dakanggipa ramako ta·rake taridape on·china, ASPF a·dok sorkariko didiataha.