Baghmara, May 21, 2025: South Garo Hills a·jani Baghmara-o MePDCL-o kam ka·gipa manderang chu·ongjaengani a·sel kam ka·anio namen neng·nikaniko man·enga ine South Garo Hills-ni Social Activist Greneth M Sangma parakatenba, chu·onga kam ka·gipa linemanrangko rakkidapchina, a·dokni Skotong Minister-na sedoataha.

Greneth Sangma-ni Skotong Minister-na sedoatgipa chittio parakatani gitade, Baghmara MePDCL-o da·odipet kam ka·giparang sak 13-san dongaia, uni a·selan bijoli nosto ong·ani somoirango aro dingtang dingtang kamrangko ka·anio neng·nikanirangko man·tokenga.

“Baghmara MePDCL-o kam ka·giparang chu·ongjani a·sel neng·nikanirangko chagrongtokengani gimin komibeoba sak 36 linemanrang aro gital staff-ko rakkidapchina mol·molatenga,” ine Social Activist, Skotong Minister-na sedoatgipa chittio parakataha.

Batanggipa 2021 bilsini May 17 tariko mol·molata gitan division office-ko dal·batatna sanction ka·aha ine janapatenba, Nongalbibra-oni Baghmara-ona Tower Line Project-ko da·onan a·bachengkujaenga. Uni gimin ua project-ko ta·raken a·bachengatchina gitaba Greneth Sangma, Skotong Minister-ko mol·molataha.

Unbaksana, Sibbari Grid Station-ko ta·raken a·bachengatchina aro South Garo Hills a·jani Karukol, Rongsu Asim aro Mindikgre songrango gital Grid Station-ko kulichina Social Activist didiataha.