@ghdnews.in@

Baghmara, Jan 28, 2026: South Garo Hills a·jani skotong Baghmara-ni Golden Beach-o salgnina ong·atenggipa Tyisam Festival-ko da·al January 28 tariko a·bachengataha. Ia festival-ko a·dokniTourism Minister Thimoty D. Shira, Baghmara-ni MLA Kartush R. Marak, sorkari official-rang aro gipin bang·a manderangni dongpaanio a·bachengate on·angaha.

Shira, Baghmara-ni Simsang Chirikamko nikon ua Chennai-ni Marina chibima rikamko gisik ra·a ine aganaha, Baghmara-ni Simsang chibima rikamni an·chengo biap dal·bata aro namen an·senga ine ua jinmana aganangaha. Baghmara jolo songdonggipa manderang tourism-ko ra·dochina, didiangan baksana a·jao tangka paisani gita tangdoaniko ra·bana Simsang Beach ba chirikamko songrebagiparangna rotobegipa biap ong·atchina didiangjolaha. Una agreba, ua a·dok sorkariko Meghalaya a·dok gimiko tourism-ko namdaproroatna nangnikaniko janapangengon, ua South Garo Hills-ni manderang a·doko man·enggipa gamrangko name jakkalchinaba didiangaha.

Ia program-ko a·bachengatani salo, pulrang aro me·su samjakrangko mesokani, git ring·susaani, chroksusaani, jatni kal·susaanirang, chirikamo kal·susaanirang aro Garo Hills-ni mingsinggipa git ring·gipa dolrang jekai North Wind aro Rough Road baksana joltangni git ring·na changnegipa dolrangni git ring·anirangko nikanggen, ineba ua aganangaha.