Shillong, Mar 13, 2025: Garo Hills-ni dingtang dingtang NGO-rang Garo Hills-oba Shillong gita apsan namroro silroroanirangko man·pana Tura-ko Winter ba Second Capital songchina dabianiko, re·anggipa Assembly Session-o a·dokni Deputy Speaker aro Resubelpara-ni NPP MLA Pa Timothy D.Shira, Winter Capital-na dabianiko jegale ka·dingstekaha ine matnangenba YouTube aro dingtang dingtang Social Media-rango gipatgipa sakgni Youtuber-rangni kosako, Shillong, Chief Judicial Magistrate-ni kachario, “Defamation Case” ba an·tangko Man-Solman re·atanina mokkordoma ka·angaha.

Pa Shira an·tangko man-solman re·atgipa Assam Goalpara a·jao donggipa Daranggiri songni Mikkanchi R Sangma aro North Garo Hills a·jao donggipa Thapa Darenchi songni Balsrang Marak-ni kosako Defamation Case ka·aha.

Ia namlani bidingo kobor ra·timgiparangna aganengon, “Tura-ko Winter Capital songani bidingo angni Assembly-o agananiko uamang, YouTube aro Social Media-o tol·e matnange gipatahani gimin anga uamang sakgnini kosako mokordoma ka·aha,” ine Shira aganaha.

“Angni Assembly Session-o agananiko uamang name ma·sigija, angko A·chik jatni kosako chakatenga aro Tura-ko Winter Capital songchina dabianiko jegalenga ine matnangenba YouTube-rango giproroatahani gimin anga Youtuber sakgnini kosako Defamation Case ka·aha” ine Deputy Speaker aganaha.

Unbaksana, Deputy Speaker-ni Ukil-ba kobor ra·timgiparangna aganengon, “Chinga da·alo ua sakgni youtuber-rangni kosako ‘Defamation’ aro ‘Criminal Defamation’ Case-rangko ka·aha. Criminal Defamation-ode uamangni matnanganirangna sakkirangko mesoke on·na man·jaode niamo pangchake sastirangko man·gen aro uamang Deputy Speaker-ni Assembly-o aganko ong·gija dake aganskaahani gimin uamang sakgnini kosako
gong kror 100-prakni Defamation Case-ko ka·aha” ine aganaha.

Adita salrangna skang Assembly Budget Session-o Tura-ko Winter Capital songchina Garo Hills-ni dingtang dingtang dolrang dabiengani bidingo chanchirimna gita Opposition dolni dilgipa Dr. Mukul Sangma, Assembly-ona Resolution-ko ra·baon, Meghalaya a·dokko man·chengaoni da·o bilsi 53 gappilona kingking changsaba Opposition dolni ra·bagipa Resolution-ko Assembly-o pass ka·a dongkuja ine Skotong Minister Conrad K Sangma-ni agana ja·man, MLA-rangoni bang·batan ua Resolution-o bakrimna jechaktokaha. Iani bidingo Assembly-ni Deputy Speaker aro Garo Hills-ni saksa bilsi bribatgipa MLA Timothy D Shira, Tura-ko Winter Capital songna chanchianiara namen nambejok, indiba ua dabianina political-ni gitade chakpaaniko on·na man·jawa inesa aganahachim.

A·bachengonin Tura-o Winter Session-ko ong·atna chanchianisa donga, indiba Tura-ko Winter Capital songna miksonganide dongja inesa Shira Assembly Session-o aganahachim. Indiba bang·bata manderangan Tura-ko Winter Capital songchina dabianiko jegalenga ine ma·sisretenba, bang·a youtuber-rang uni kosako matnangattokskaha.