Guwahati, March 29, 2026:Assam a·doko poraienggipa lakni lak, chatro chatrirang an·tangtangni gisiko knana sike sengsoenggipa, High Skul Leaving Certificate (HSLC), porikkani result-rangko mikkang ja April-ni 10 tariko parakatgen, ine Assam a·dokni Skotong Minister Himanta Biswa Sarma, March 29 tarik Robibar salo parakataha.

Assam-ni Skotong Minister, an·tangni eleksin-na campaign ka·mitting somoio chatro chatrirangni HSLC porikka result-rangko basako parakatgen ine sing·anirangna, Himanta Biswa Sarma, April 10 tariko HSLC-ni porikka result-rangko parakatgen ine ku·rachangaha.

Assam, Board of Secondary Education-ni ong·atanggipa HSLC porikkarangko ia bilsini February 10 tarikoni 27 tarikona a·dok gimikni porikka sechakram Centre-rango ong·atangaha.