Tura, April 20,2025: East Garo Hills, Mangsang-ni ning·o donggipa Nongkongkil aro Moronga songrangko Khasi Hills-ni a·a ine Khasi-rang ra·sekraengani gimin A·chik State Peoples’ Front (ASPF)-ni dilgiparang re·ange songni Lasker-rang aro manderangko gronge sing·sandianiko dakangaha.

Mogru, Nongkongkil aro Moronga songrangara Garo Hills-osa ga·akachim aro uano songdongenggipa manderangara A·chikrangan bangbatachim. Khasi-rang, Garo Hills-ni a·arangko a·kangdrae sima ari songani gimin songni manderang raken jegalaniko dakenba, Garo Hills-ni a·ako jaksisaba on·jawa aro Khasi Hills-ni a·ako jaksisaba ra·jawa ine parakataha.

Uano songdongenggipa manderang GHADC-ni ning·on an·tangtangni gamchatbegipa vote-rangko mamingba neng·nikani grian on·enga ine ASPF parakataha.

Uni gimin jatgnini gisepo ma·sisrete kajia ong·grikjana gita Skotong Minister Conrad Sangma-ko ta·raken ia obostako nirokatchina ASPF didiataha. Unbaksana, GHADC-ni ning·o ga·akgipa a·arangko CEM dingtangmancha digital mapping ka·china gitaba didiataha.