Tura, May 4, 2025: A·chik State Peoples’ Front (ASPF) aro GSMC, chang 9-gipa Winter Capital Awareness Campaign Meeting-ko May 3 tarik Sonibar salo West Garo HIlls a·jani Balachanda kal·chakram biapo ong·atangaha.

Ua tom·anio Balachanda, Chandalkona, Rajabala A·king Nokmarang baksa A·chik Progressive Approach (APA) Rajabala Unit-ni President dongpae, Tura-ko Winter Capital songchina dabianiko namnikpae ku·rang on·angpaaha.

A·chik a·songna Winter Capital-ko dontongija dabidilenggipa NGO-rangni mongsongipa dilgiparangara ASPF-ni General Secretary Bernita R. Marak aro GSMC-ni Acting Chairman Balkarin Ch. Marak, Garo Hills-ni dingtang dingtang biaprangona re·roroe, Winter Capital-ni bidingo manderang baksa ku·monganiko dakenga.

Tura-ko Winter Capital songchina dabiani miksonganiko manderangna talatna, “Chinga Awareness Campaign Meeting-rangko Garo Hills gimikon ong·ate, ru·uta bilsirangoni dabienggipa, Winter Capital-ko chu·sokate on·china sorkariko didienga. Bang·a manderang ia dabianiko namnike ra·chakenba chakpaaniko on·tokenga aro tom·a changantion bakko ra·tokenga ine Bernitha Marak parakataha.

Garo Hills-o songdongenggipa manderangni palo, “Chinga a·dokni Skotong Minister-ko mol·molenga. Ia Winter Capital-ni bidingo songdongenggipa manderang, Civil Society Organisation-rangko man·chape, ASPF aro GSMC baksa tom·aniko ong·ate, Winter Capital Committee-ko senggnang songe on·china”, Bernita Marak didiataha.

Indake, Sonibar salni tom·anio bak ra·gipa sakantikon, ASPF-ni dilgipa mittelpilatenba, re·baenggipa May 10 tariko West Garo Hills a·jani Raksamgre kal·chakram biapo Winter Capital-na minge tom·anko ong·attaigen ine ASPF dilgipa parakataha.