@ghdnews.in@

Williamnagar, Jan 23, 2026: Asanang-oni Samanda-ona gital rama tarigipa namsrangjani gimin taria matchotani bakan rama nosto ong·engaha ine Simsanggre-ni A·chik Organisation for Social Welfare (AOSW), East Garo Hills PWD (Road)-ni Executive Engineer-na badi ka·doatenba, ua ramako tariani bidingo ta·raken sandirokchina didiataha.

AOSW-ni parakatani gitade, ua ramako MIDS Company tariahachim, indiba ua ramako namgijagipa bosturangchi tariani a·sel aro kamrangko name ka·jani a·sel da·on ua ramarang nosto ong·na a·bachengengaha.

“Asanang-oni Samanda-ona tarigipa Samanda C&RD Block-ni ning·o donggipa Rangmalgre jolrango rama taria namsrangjaha. Ramani rikamrango ro·ongrangni tang·srisraako nikna man·aha aro rama kosako prakbaenganikoba niknaha. Ua rama da·on nosto ong·na a·bachengengahani gimin, re·ruraenggipa manderangna kenchakani ong·enga,” ine AOSW-ni dilgiparang, PWD (Roads)-ni Executive Engineer-na sedoatgipa chittio parakataha.

Iandakgipa kamrang, rama tarianio niamrangko ja·rikgijaniko mesokanisan ong·aija, indiba ramako re·ruraenggipa manderangni janggirangnaba kenchakaniko ra·baenga. Ua ramako ta·raken re·ange nichina aro contractor-ni kosako rakgipa ja·kurangko de·china AOSW, PWD (Roads) official-ko didiataha.