Shillong,Sept 11,2024: A·chik National Volunteers Council (ANVC) bobil dolrang baksa sorkarini songgigrikaniko da·o taridapna sienggipa Sixth Schedule-o chapatna man·jaha ine Warachakenggipa dolni dilgipa Dr Mukul Sangma, a·dok sorkariko matnangataha.

ANVC bobil dolrang baksa ma·mong aro a·dok sorkarini songgrikani namgniara, Sixth Schedule-ko taridapani ong·achim, ia namgnirangko a·dokni pilak Autonomous District Council (ADC)-rangan man·na nangachim.

ANVC dolrang baksa songgigrikaniara manderangni nangnikanirangko chu·sokatna aro Sixth Schedule-o pangchake district council-ni kamko mangrakbatatna gita ma·mong aro a·dok sorkari dolgnian bilakgipa kol ong·achim ine Dr. Sangma aganaha.

Ia songgigrikaniko nipiltaiani gri a·dok sorkari, an·tangni daitoko chu·sokatna man·jaha ine matnangatenba, ADC-rangko namdapatna gita sorkario maming sikani aro on·kangani dongja ine Opposition dolni dilgipa parakataha.

Dr. Sangma-ni parakatani gitade, ANVC bobil dolrang baksa songgigrikaniko a·dok sorkari simsakjani a·selsa sorkarini pilak kamrangan chu·sokgijaniko nikna man·enga.

Sixth Schedule a·jarango ADC-rangna dingtangmancha on·gimin daitorangko, gipin biaprango gita Sixth Schedule a·jarango Panchayati Raj System dongja ine Dr. Sangma parakataha.

A·doko Panchayati Raj System dongjani gimin ADC-rangna pilak dakchakanirangko on·skana nanga, ineba Opposition dilgipa didiataha.

ANVC dolrang baksa songgigrikanio pangchakesa ADC-rangna tangka paisarangko dakchakataha aro district council-rangko kim·kim ong·e rakkina gita a·dok sorkari, tangka paisarangko man·bae on·na nangkuenga ineba Dr Sangma parakataha.