Shillong, Sep 27, 2025: Re·anggipa 2014 bilsini September 24 tariko A·chik National Volunteers Council (ANVC) aro ANVC-B dolrang baksa a·dok aro ma·mong sorkarini songgigrike soi ka·grikaniko nipiltaina gita Sukrobar salo, a·dok sorkari, Garo Hills Autonomous District Council (GHADC) aro ANVC aro ANVC-B dolni dilgiparang baksa Shillong-o tom·aniko ong·atangaha.

Ua tom·aniko a·dokni Deputy Chief Minister Prestone Tynsong dilangaha aro tom·anio GHADC-ni CEM Albinush R.Marak, Deputy CEM Nikman Ch.Marak, ANVC-ni gitcham Chairman Dilash Marak, ANVC-B-ni Chairman Bernard N.Marak aro gipin sak 8 dilgiparangba bak ra·angaha.

Indake tom·anio ANVC aro ANVC-B dolrang baksa songgigrikaniko nipilangengon, Autonomous District Council-rangko mangrakbatatana, Garo Hills-o skie on·chakram biaprangko namdapatani, rama jal·langrangko namdapatani aro uandakgipa dingtang dingtang namroro silroroani kamrangko ra·baani bidingo a·dok sorkari, ANVC aro ANVC-B dolni dilgiparang baksa chanchirimangaha.

Tom·a matchotani ja·man ANVC-B dolni gitcham Chairman aro Tura-ni MDC Bernard N Marak, kobor ra·timgiparangna aganengon, 2014 bilsio je kamrangkon chu·sokate on·na ma·mong sorkari ANVC aro ANVC-B dolrangna ku·rachakahachim, ia kamrangko da·o chu·sokatna gita a·dok sorkari ku·rachakaniko on·angaha aro jagittamprakon kamrangko nipilna gita tom·aniko ong·atna ku·rachakaha ine aganaha.

ANVC aro ANVC-B dolrang baksa songgigrikaniko nipilna bilsichet mangna skang tom·aoni da·alsa tom·aniko ong·atpiltaiahani gimin a·dok sorkari, ANVC aro ANVC-B dolrang baksa songgigrikaniko chu·sokatna kang·kare kae kamrangko ka·na ku·rachakangaha ineba Marak aganaha.

ANVC aro ANVC-B dolrang baksa songgigrikanio pangchake, GHADC-o kam ka·enggiparangna ja 44-ni dormaharangko on·na gita gong kror 252 tangkarangko man·chape gimik gong kror 664 lak 49 tangkarangko Meghalaya sorkari, ma·mong sorkarioniko bi·ataha.

Uanoni gong kror 308 tangkarangkode buring bolgrimrangko ripingna aro buring bolgrimrango nangchakegipa dingtang dingtang kamrangna jakkalanggen ine Marak parakataha.

Ua tangka paisarangko jakkalsretjana gita a·dok sorkari State Finance Commission-ko songna nanggen ine ANVC-B-ni gitcham Chairman dabiangskaha.