Shillong, Sep 26, 2025: A·dokni Dakchakgipa Skotong Minister aro Home Pulis-ko jako ra·enggipa Prestone Tynsong, gitcham A·chik National Volunteers Council (ANVC) aro ANVC (B) dol baksa 2014 bilsini September 24 tariko Agreed Tax for Settlement (ATS)-ko soi ka·grikani bidingo nipiltaianiko dakna Sukrobar salo tom·aniko ong·atanggen ine parakataha.

Ia tom·anio GHADC-ni Chief Executive Member (CEM) Albinush R.Marak, Deputy CEM Nikman Ch.Marak baksana ANVC-ni Chairman Dillash Marak aro ANVC-B-ni Chairman Bernard N Marak baksa gitcham ANVC-ni sak 8 dilgiparang bak ra·anggen.

GHADC-o kam ka·enggiparangna ja 43-ni dormaharangko on·na man·gija dongenggipako gamna gita gong kror 252-ko a·dok sorkari ia Settlement-ni ning·o gong kror 664 lak 49 tangkarangko ma·mong sorkarioniko September 20 tariko bi·ataha.

Commissioner & Secretary Dr. Vijay Kumar D, Ministry of Environment, Forest aro Climate Change-na gong kror 308 mangni Project-rangko namnike ra·chakman·aha ine Ministry of Home Affairs (MHA)-na u·iataha. Iani gisepon, DPR-ni Solar Street Light-rang, songni anti cha·ram biaprangko namdapatan baksana bite-rangko ge·anina tangka gong kror 104 lak 34 mangni Project-rangkoba on·manaha.

Indake ong·engon, Tura-ni MDC aro BJP-ni State Vice President Bernard N Marak, GHADC-o ong·enggipa obostarangara uamangni ku·monggrikaniko nigalani a·selsa ong·enga ine sorkarini kosako matnangataha.

‘Garo Accord’-o ku·rachakgimin, gita Monitoring Commitee-ni tom·bimonganiko ong·atronga baksana State Finance Commitee-ko songe on·china gitaba Marak dabiataha.