Shillong, March 17: Meghalaya Pradesh Congress Committee (MPCC)-ni Working President Deborah C. Marak, Garo Hills-o champengatenggipa ba bon ka·enggipa internet service-ko ta·raken watpiltaichina, a·dok sorkario dabiangaha.

Internet dongjani a·sel salantio janggi tangenggipa manderang namen neng·nikanirangko man·tokenga ine ua parakataha.

Ua (Deborah) Garo Hills-o songdongenggipa manderangni palo aganchakaniko on·atengon, antisa batpile internet-ko champengatani a·sel songsalni pilak kamrangon neng·nikanirangko man·enga ine Congress dilgipa parakataha.

Ia digital-ni chasongo internet-ara manderangna namen nangchongmotgipa ong·a, ineba ua agandapataha.

Marak-ni parakatani gitade, internet dongjani a·sel bading-chiwalani kamrango aro chatro chatrirangni poraianio namen neng·nikanirangko man·tokenga aro pilak dakgipa kamrangna aro salanti hajira kam ka·e cha·enggipa manderang an·tangtangni tangka paisarangko okna aro dingtang dingtang kamrangko ka·na man·jae, dal·bea gimaani ong·enga.

Uasan ong·aigija, sorkari Office-rango aro private sector-rango kam ka·enggiparang namen neng·nikanirangko man·enga.

Uandake, chatro chatrirangan online class-rangko ra·na gita man·jaenga aro poraina gita nanga bosturangko brena aro porikkani gimin u·iatanirangko man·jaengani a·sel uamangni poraianio namen nangchakeani ong·enga. Uandaken bank-ni kamrangko champengatna nangani a·sel manderang namen neng·nikanirangko chagrongna nangenga.

Je, niam aro gital gital obostarangko nirokna gita internet-ko bon ka·aniara, niam gita ong·genchimoba, salsni mangna baten internet-ko watgija champengataniara agrepilengaha aro ian sorkarini kam tik ong·gijaniko parakani ong·enga, ineba Marak sorkarini kamko jegalataha.

Iandake ru·uta somoina internet-ko champengatani bidingo, “Maini gimin Garo Hills-ni manderang indake duk chakna nanga?” aro “Niamko rakkina gita manderangni janggi tanganiko champenggija gipin cholrang dongjama?” ine Congress dilgipa sing·doataha.

“Internet-ko ta·rake watpilchina aro internet-ko champengatanichi manderangni neng·nikanirangko baridapataniara, a·dok sorkarini kakket ong·gijaniko mesokani ong·a aro manderangna pap gri neng·nikaniko on·enga” ineba Marak parakataha.