Tura, Oct 25, 2024: Re·baenggipa November 13 tariko ong·atenggipa Gambegre by-election-o susana gita NPP-ni candidate aro a·dokni Skotong Minister Conrad K Sangma-ni jikgipa Dr. Mehtab Chandee A. Sangma Bristibar salo, Tura DC office-ona re·ange, Returning Officer-ni mikkango an·tangni nomination lekkarangko on·angaha.

Uni nomination file ka·ani salo, a·dokni Skotong Minister Conrad K Sangma baksana NPP-ni dingtang dingtang MLA-rang aro gipin dilgiparang dongpaaha. Dr. Chandee an·tangni nomination lekkarangko on·ani ja·man, kobor ra·timgiparangna aganengon, Gambegre constituency-o rama jal·lang aro an·seng baljokaniko on·anian mongsonggipa dakna nanggni kam ong·gen ine aganaha.

Ia by-election-o ua chena ka·dongengama ine sing·anina aganchakengon, “Anga chena ka·donga inede aganjawa, maina election ge·antian rakgipa ong·a aro anga darangkoba galone aganjawa, indiba anga krenge susanasa nangenga. Bang·a manderangan angna chakpaaniko on·engani gimin anga chenade ka·dongaia” ine Dr. Chandee aganaha.

General aro by-election-ni dingtanggrikani gimin sing·anina aganchakskaengon, by-election-ode manderang sawa sorkariko chalaienga uko nikenba, an·tangtangni namgnina dilgipako seokna altubata ine Dr. Sangma aganaha.

Ia by-election-o ua badia party baksa rakbate susana nangenga ine sing·on, “Gambegre constituency-ara da·o MP ong·enggipa Saleng A Sangma-ni ru·uta bilsirangna rim·kepgipa seat ong·a, indiba ia by-election-o angna Congress aro dingtang dingtang party-ni manderangba chakpaengani gimin, chinga TMC baksasa susagrikani ong·batgen ine aganoba ia constituency-o Saleng Sangma-ni bimingba dongkuenga” ine Dr Chandee aganaha.

A·dokni Skotong Minister Conrad K Sangma-ba dongpae, Gambegre constituency-ni ning·o skanggipa rama jal·lang, sanna banani cholrang aro uandaken bang·a kamrangkon namdapataniko nangenga ine aganaha.