Tura, Oct 24, 2024: Re·baenggipa November 13 tariko ong·atenggipa Gambegre by-election-o susana gita Budbar salo, TMC-ni candidate aro Dengnakpara-ni MDC Ma Sadhiarani M Sangma an·tangni nomination lekkarangko Tura DC office-o Returning Officer-na on·eaha.

Ma Sangma-ni nomination file ka·ani salo, a·dokni gitcham Sports Minister Zenith Sangma, a·dokni gitcham Skotong Minister Dr. Mukul Sangma gipin TMC dilgiparang aro TMC-na chakpaenggipa manderangba dongpaaha.

TMC candidate, an·tangni nomination lekkarangko Tura DC office-o Returning Officer-na on·ani ja·man, kobor ra·timgiparangna aganengon, “Anga Gambegre constituency-o susaa ia by-election-ko ra·e, gittamgipa chang ong·enga. Indaken anga Gambegre-ni kona noksikrangona re·ange manderangko grongaha aro uamangni neng·nikaniko man·sia. Gambegre jolrango dakna nangchongmotgipa kamara rama jal·langan mongsongbatgipa ong·enga. Ia by-election-o anga chegenchimode, skanggipa rama jal·langrangkon tarichengna jotton ka·gen” ine Ma Sangma aganaha.

Ia by-election-o NPP candidate Ma Mehtab Chandee A Sangma, Congress candidate Jingjang Marak, BJP candidate Bernard N Marak aro gipin Independent candidate-rang baksa susaengon, na·a chena ka·dongengama, ine sing·anina aganchakengon, “Gambegre constituency-ni manderang angna ka·saani gimin anga chena ka·dongenga” ine TMC candidate aganaha.

“Anga ia by-election-o chena namen ka·dongmanchaenga, maina Gambegre-ni manderang angna ka·saa aro angaba uamangna ka·saa. Anga Gambegre-ni pilak biaprangonan re·ange uamangni neng·nikanirangko ma·sia aro uamangna maiko skanggipa dakna nangengachim anga nikmanaha” ine ua aganaha.

Ia by-election-o badia party-ni candidate baksa bilakbate susagrikna nangenga ine sing·anina aganchakengon, “A·dok sorkariko chalaienggipa NPP dolni candidate, Ma Mehtab Chandee baksa bilakbate susagrikani ong·gen. Congress candidate baksade, susagrikani ong·jawa, maina Congress-ni bang·a manderangan ang baksa ong·enga” ine TMC candidate Ma Sadhiarani Sangma aganaha.