@ghdnews.in@

Ampati, Nov 6, 2025: South West Garo Hills a·jani nangrimgimin NGO-rang chong·motan AYWO-ni President Brilliant Sangma, FKJGP-ni President Nikjagring Sangma, AAYF-ni President Baltun Sangma aro GOERA-ni President Newstar Sangma, South West Garo Hills a·jani Deputy Commissioner aro State Bank of India, Ampati Branch-ni Manager-ko gronge, Ampati Civil Hospital mikkango aro DC office campus-o ATM boot ge·gniko songe on·china didiangaha.

NGO-rangni seatgipa chittio janapatani gitade, bang·a manderangan Ampati Civil Hospital-o sana bananiko ra·na re·batokengon, hospital sepango ATM dongjani a·sel samrangko brena aro tangka paisarangko gamna nangani somoio tangka okna man·jani a·sel, chel·begipa Ampati bajar aro petrol pump-ona re·angesa tangkarangko okna nangengani a·sel namen neng·nikbeani ong·enga.

Apsandaken Deputy Commissioner Office-oba bang·a manderang dingtang dingtang nanga kamrangna aro lekkarangko tarina re·batokengon, tangka paisarang bon·changani somoio, ATM dongjani gimin, salsani kamrangko matchotna man·jae neng·nikani ong·enga aro nanggitikan somoio tangkarangko okna man·jae, sakgipinchiko sud-na ra·sroe kamrangko matchotatna nangengani gimin namen neng·nikaniko man·enga ine NGO-rang parakataha.

Uni gimin ta·raken ua biaprango chong·motan Ampati Civil Hospital mikkango aro Deputy Commissioner office campus-o ATM machine-rangko tarie on·china NGO-rang dabiangaha.

Uni gimin ua biaprango ATM machine-rangko songe ba teke on·genchimode, jolni manderangna namen jakkaltobegipa aro tangka paisa nangan somoio dakchakbeani ong·gen ine parakataha.