Tura, April 20, 2025: All Meghalaya Muster Progressive Workers’ Union (AMMRPWU), Headquarter Shillong, Central Body (CB)-ni chang 5-gipa General Meeting-ko re·baenggipa April 26 tarik Sonibar salo, West Khasi Hills a·jani Skotong songjinma Nongstoin-o ong·atenga.
Uni gimin, dingtang dingtang sorkari department-rango Muster Roll-ni kamko ka·enggiparang, jemangan AMMRPWU-o bakrimengachim, meeting-ona re·bae bak ra·epachina, AMMRPWU, HQ-ni President Huberth Kharbani mol·molataha.
Apsandaken,All Meghalaya Muster Roll Progressive Workers’ Union (AMMRPWU) Garo Hills Zone (GHZ), Tura-o bakrimenggipa dingtang dingtang department-rango Muster Roll (MR)-ni kamko ka·enggiparang, April 26 tariko ong·atenggipa General Meeting-o an·tangtangko choljokate, meetingo dongpae, Meghalaya gimikni MR-rang baksa apsan ku·mongrimaniko on·pachina, AMMRPWU, GHZ-ni General Secretary Dalseng Sangma-ba mol·molaniko on·ataha.
AMMRPWU mikkangchi maikai MR-rangni dingtang dingtang neng·nikanirango apsan ku·monge kamko ka·na man·gen, uni gimin department ge·antio MR-ni kamko ka·giparangni apsan ku·monganiko nangenga aro apsan ku·monge kamrangko ka·achisa chu·sokaniko man·gen ineba Kharbani u·iataha.
